ՀՀ վարչապետ Նիկոլ Փաշինյանը ՊՆ-ում ներկայացրել է նորանշանակ նախարար Դավիթ Տոնոյանին
ՀՀ ՊՆ մամուլի խոսնակ Արծրուն Հովհաննիսյանը ֆեյսբուքի իր էջի միջոցով տեղեկացրել է, որ ՀՀ վարչապետ Նիկոլ Փաշինյանն այսօր Պաշտպանության նախարարությունում ներկայացրել է նորանշանակ նախարար Դավիթ Տոնոյանին:
«ՀՀ Վարչապետ Նիկոլ Փաշինյանը այսօր Պաշտպանության նախարարությունում ներկայացրեց պաշտպանության նորանշանակ նախարար Դավիթ Տոնոյանին։ Նիկոլ Փաշինյանն իր խոսքում կարևորեց այն ուղղությունները, որոնց ուղղությամբ պետք է աշխատենք և շնորհակալություն հայտնեց նախկին նախարար Վիգեն Սարգսյանին կատարած աշխատանքի համար»,-գրել է Արծրուն Հովհաննիսյանը:
ՀՀ նախագահ Արմեն Սարգսյանի հրամանագրով Դավիթ Տոնոյանը պաշտպանության նախարար էր նշանակվել մայիսի 11-ին։ Բացի այդ, երեկ ևս 3 այլ նախարար է նշանակվել։
Մասնավորապես՝ կրթության և գիտության նախարարի պաշտոնը ստանձնել է Արայիկ Հարությունյանը:
Սփյուռքի նախարար է նշանակվել Մխիթար Հայրապետյանը: Տարածքային կառավարման և զարգացման նախարար է նշանակվել Սուրեն Պապիկյանը:
Նախագահ Արմեն Սարգսյանի հրամանագրով մայիսի 11-ին Արարատ Միրզոյանը նշանակվել է ՀՀ առաջին փոխվարչապետ, իսկ Տիգրան Ավինյանը՝ փոխվարչապետ։
