Արցախը կվերադառնա՞ բանակցային սեղանի շուրջ. քննարկումները շարունակվում են
Ալիևը շարունակում է սպառնալիքների լեզվով խոսել, իսկ Երևանում շարունակվում են քննարկումները, թե արդյո՞ք Արցախը կվերադառնա բանակցային սեղանի շուրջ, ինչ հնարավոր զարգացումներ են սպասվում ԼՂ հակամարտության բանակցային գործընթացում։
Ալիևին լիակատար պարտություն է սպասվում՝ վստահեցնում է ՀՀ ԱԳՆ մամուլի խոսնակ Տիգրան Բալայանը՝ արձագանքելով Հեյդար Ալիևի 95- ամյակին նվիրված միջոցառման ժամանակ Իլհամ Ալիևի հայտարարությանը, թե իբր Ադրբեջանի դրոշը պետք է բարձրանա Արցախի բոլոր տարածքների ու Ստեփանակերտի վրա:
«Խորհրդանշական է, որ հարեւան երկրի բռնապետը այս հայտարարությունն արել է մի մարդուն նվիրված միջացառմանը, որը եւս այդպես մտածեց եւ ձախողվեց։ Այդպիսի ճակատագիր է սպասվում նաեւ նրա որդուն։ Հայրը բավական իմաստուն գտնվեց ժամանակին կանգ առնելով՝ հրադադար խնդրելով։ Ադրբեջանի ժողովրդին մնում է հուսալ, որ այդ իմաստությունը, գոնե դրա մի մասը, ժառանգաբար փոխանցված կլինի»:
Մինչ Ալիևը շարունակում է հոխորտանքները, պաշտոնական Երևանը նոր մոտեցումներ է ներկայացնում ղարաբաղյան խնդրի կարգավորման գործընթացում: Արցախին բանակցություններին ներգրավելու վարչապետ Նիկոլ Փաշինյանի հայտարարությունն այսօր հերթական անգամ քննարկման թեմա է դարձել Երևանում:
«Ինչ տարածքներ չկա տարածքների հարց կա գենոցիդի մաս: Չի կարծու որ Բաքուն ընդառաջ կգնա»:
Այսօր ավտորիտար Ադրբեջանի կողքին հայտնվել է ժողովրդավարական Հայաստան, ինչը աշխարհի ուշադրությունն է գրավել։ Սա բնականաբար նշանակում է, որ պաշտոնական Երևանն այսօր ավելի ամուր դիրքերից է ներկայանում միջազգային հարթակներում:
ԱԺ արտաքին հարաբերությունների հանձնաժողովի նախկին նախագահ Հովհաննես Իգիթյանն էլ ցավով նկատում է, որ ղարաբաղյան խնդիրը աշխարհում ներկայացվում է իբրև տարածքային վեճ ՀՀ-ի եւ Ադրբեջանի միջև, սակայն պետք է իրականությունը ներկայացվի, բանակցային գործընթացում նոր էլեմենտների ներառումը կարևոր է՝ ասում է՝ հուշելով՝ պետք է ներկայացնել միջազգային հանրությանը, որ այսօրվա խնդիրը Արցախի անվտանգության հարցն է.
«ԼՂՀ անվտանգության ապահովման հարց է պետք բարձրացնել»:
Ստեփանակերտից քաղաքական վերլուծաբան Տիգրան Գրիգորյանի կարծիքով՝ լուրջ փոփոխություններ չպետք է ակնկալել կարգավորման գործընթացից, քանի որ դժվար թե Բաքուն համաձայնի տեսնել Արցախին իբրև բանակցային կողմ։ Այդուհանդերձ՝ նա ողջունում է նոր մոտեցումները ղարաբաղյան խնդրում:
«Սերժ Սարգսյանի ղեկավարության օրոք քնած վիճակում էր ՀՀ—մ: Հիմա հասել ենք նրան« որ խոսվում է տարածքներ՝ խաղաղության դիմաց ոճով»:
Մոտակա տասնամյակում ղարաբաղյան խնդիրը, նրա կարծիքով, լուծում չունի և գոյություն ունեցող ստատուս-քվոյի պահպանման միակ այլընտրանքը պատերազմն է։ Սակայն նոր իրողությունը մի փոքր փոխել է իրավիճակը, պատերազմը մի փոքր հետաձգվել է, քանի որ այսօրվա իրողության պայմաններում ՀՀ- ն ավելի ամուր դիրքերում է գտնվում, միջազգային հանրությունը չի ընդունի ռազմական որևէ դրսևորում: