Հայ Առաքելական Եկեղեցին մայիսի 10-ին` Ս. Հարության տոնից 40 օր հետո, նշում է Հիսուս Քրիստոսի երկինք համբարձվելու տոնը:
Արաբկիրի նորակառույց Սբ. Խաչ եկեղեցու բակում Ջանգյուլումի համար բոլոր անհրաժեշտ պարագաները կան՝ գորգ, կուլա, վիճակի ծաղկեփնջեր, խաչաձև Ծաղկամեր, վարդերով լի երկու զամբյուղ՝ 2 կարաբալաների համար ու ամենակարևորը՝ բազմաթիվ երեխաներ ու երիտասարդ աղջիկ-տղաներ:
Համբարձումն եկավ, ծաղկունքը ալվան
Զուգել են հանդեր նախշուն գորգերով:
Փունջ—փունջ աղջիկներ սարերը ելան
Վիճակ հանելու աշխույժ երգերով:
Համբարձման օրը ընդունված է որպես ջրի ու ծաղկի, ինչպես նաև` Ճակատագրապաշտական տոն, որի գլխավոր արարողությունը վիճակ հանելու ծեսն է:
Նունեն առաջին տարին չէ, որ մասնակցում է տոնախմբությանը: Բայց վիճակահանությանը երբեք չի մասնակցել, այս տարի կմասնակցի:
Արաբկիր համայնքի տեր Բաբկեն Քահանա Հայրապետյանն ասում է, ինչը մոլորություն չէ ու ընդունված ժողովրդի կողմից, ընդունելի է նաև եկեղեցու կողմից:
Վիճակի մասնակիցները հույսով սպասում են, ու եթե վիճակի խաղիկով բարի բախտ գուշակվի, ապա անպայմանորեն իրենց ցանկությունը, իղձը կկատարվի:
Մեր օրերում Համբարձման վիճակը, Ջան գյուլումը, ծաղիկ գովելը համարյա մոռացվել են և մնացել են միայն զբոսանքի, ուխտագնացությունների սովորությունները:
Համբարձման տոնը հայտնի է նաև իր ուխտագանցության ավանդույթներով: Յուրաքանչյուր բնակավայր ունի Համբարձման իր ուխտավայրը:
