Բաքուն ստիպված կլինի մեղմացնել իր հռետորաբանությունը. քաղաքագետ
Վարչապետ Նիկոլ Փաշինյանը Արցախյան հակամարտության կարգավորման գործընթացին անդրադառնալով մի քանի անգամ արդեն շեշտել է Արցախին բանակցային կողմ ներգրավելու կարևորության մասին: Որ դեպքում է դա հնարավոր և որքանով է իրատեսական:
Արցախ այցը Նիկոլ Փաշինյանի առաջին պաշտոնական այցն էր, առաջին ասուլիսը վարչապետի պաշտոնում հենց Ղարաբաղում էր: Ջերմ ընդունելությանը հաջորդեց ղարաբաղյան խնդրի կարգավորման գործընթացում նոր մոտեցման արձանագրումը:
Բանակցային ձևաչափը լիարժեք համարվել չի կարող, քանի դեռ դրան չի մասնակցում Արցախը հստակեցրեց նա: Ղարաբաղյան խնդրի խաղաղ, միջազգային իրավունքի հիման վրա կարգավորման գործընթացում կարծրատիպերը պարտադիր չեն:
Հայաստանը կոշտացնում է դիրքորոշումը ղարաբաղյան խնդրում՝ ասում են քաղաքագետները։
Արցախի ԱԺ արտաքին հարաբերությունների հանձնաժողովի նախկին նախագահ Վահրամ Աթանեսյանը մինչդեռ առայժմ չի շտապում կարծիք հայտնել, դեռ պետք է հասկանալ, թե ինչ նպատակով է արվում այդ հայտարարությունը:
«Հարգանքի տուրք է կարծում եմ, որ չասեն, թե որևէ փոփոխություն չի մտցնում: Բայց հարց է, թե ինչ նպատակով է դա արվելու»:
Կան պայմանավորվածություններ, որոնք շրջանցելը բավականին դժվար է և ռիսկային, ու մարտահրավերների հետ է կապված՝ ասում է:
Իրականությունն այլ է, դրանք հաշվի առնելով պետք է հետագայում քայլեր ձեռնարկվեն ու պաշտպանվեն այն սկզբունքները, որոնք հայտնի են, նշեց Վահրամ Աթանեսյանը:
Միջնորդները բազմիցս հայտարարել են, որ բանակցությունների որոշակի փուլում Արցախը ևս պետք է մասնակցի բանակցություններին ու իր խոսքն ասի:
Մասնակցությունը չի կարող ինքնանպատակ լինել, ես ուզում եմ հասկանալ, թե որն է այդ հայտարարության նպատակը՝ ասաց Արցախի Աժ արտաքին հարաբերությունների հանձնաժողովի նախկին նախագահը:
Քաղաքագետ Հայկ Մարտիրոսյանը, մինչդեռ, վստահ է այդպիսով՝ գնդակը նետվում է Ադրբեջանի դաշտ և պաշտոնական Բաքուն ստիպված կլինի մեղմացնել իր հռետորաբանությունը՝ կարծում է։ Ըստ քաղաքագետի՝ դրա համար լավ հիմք է Նիկոլ Փաշինյանի բարձր լեգիտիմությունը թավշյա հեղափոխությունից հետո: