Ինչ արժեցավ թավշյա հեղափոխությունը
Տնտեսապես ինչ արժեցավ թավշյա հեղափոխությունը. այս պահին մասնագետները պատասխան դեռ չունեն:
«Ռադիոլուրի» զրուցակից տնտեսագետ Արտակ Մանուկյանը նախնական դիտարկումներ արել է:
Մասնագետի խոսքով, երկարաժամկետ ու կարճաժամկետ հատվածներում սպասումները ձևավորված են, իսկ գնահատական ունենալու համար պետք է սպասել:
Մանրածախ առևտուր և զբոսաշրջություն. այս երկու ոլորտներն են, որոնք առաջինն են իրենց վրա զգում հեղափոխության առաջին արդյունքները: Ամբողջական պատկեր, թե այն ինչ արժեցավ, դեռ վաղ է ասել՝ ասում է «Ռադիոլուրի» զրուցակիցը՝ տնտեսագետ, Հանրային քաղաքականության հետազոտությունների ազգային կենտրոնի նախագահ Արտակ Մանուկյանը։
Մանրածախ առևտրի մասով պետք է պաշտոնական վիճակագրությանն ապավինել: Այս պահին դրանք դեռ չկան, սակայն մասնագետն ունի նախնական գնահատական.
«Ոչ ամբողջական գնահատականներով՝ այդ ազդեցությունը մանրածախ առևտրի վրա 2-3 տոկոս անկման մասին կարող ենք խոսել: Անկումն ավելի շատ է այն խանութների կամ սուպերմարկետների մոտ, որոնց բոյկոտում են: Այստեղ կարող ենք վստահաբար խոսել առևտրի երկնիշ թվի անկման մասին»:
ԱՎԾ-ն այսօր հրապարակեց ապրիլ ամսվա սպառողական գների ինդեքսը։ Պաշտոնական վիճակագրության համաձայն, պարենային գրեթե բոլոր ապրանքային խմբերում ապրիլին մարտի համեմատ գնանկում է տեղի ունեցել:
Ոչ պարենային ապրանքների գները բարձրացել են, 2018թ. ապրիլին մարտի համեմատ բենզինի և դիզելային վառելիքի գների մակարդակը մնացել է անփոփոխ: 2018թ. ապրիլին 2017թ. ապրիլի համեմատ հանրապետությունում գրանցվել է բենզինի և դիզելային վառելիքի՝ համապատասխանաբար 16.6% և 25.9%, իսկ 2017թ. դեկտեմբերի համեմատ՝ 9.3% և 20.4% գնաճ:
Տնտեսագետ, ԵՊՀ տնտեսագիտության ֆակուլտետի դեկան Հայկ Սարգսյանը «Ռադիոլուրին» իր դիտարկումներն է փոխանցում. «Ֆինանսական կայունության և գնաճային ցուցանիշերի հետ կապված փոխարժեքի տատանման հետ կապված խնդիրներն այսօր չեն կարող մտահոգել»:
«Ներքին առևտրին ու զբոսաշրջությանը նաև՝ ֆինանսական շուկայի վրա ունեցած ազդեցությունն է ավելանում»,-ասում է տնտեսագետ Արտակ Մանուկյան.
«Հայկական դրամը դոլարի նկատմամբ արժեզրկվել է, բայց այն չնչին է՝ 0,5 տոկոսի կարգի է, որը տնտեսվարող սուբյեկտների մոտ, չնայած կամայական փոփոխության, անորոշություն է ծնում, ապագան նրանք ավելի դրական են գնահատում»:
Երկարաժամկետ ու կարճաժամկետ հատվածներում՝ սփյուռքը դրական սպասումներ ունի, իսկ դրա ամենավառ արտահայտությունը՝ ներդրումներն ու նոր գրանցվող ձեռնարկությունների թիվն է:
«Եթե մենք այս երկու թվերով տեսնենք, որ էական աճ կա, կարելի է ասել, որ կարճաժամկետ հատվածում ակնկալիքները վերածվում են կոնկրետ նյութական արժեքների, ներդրումների ներհոսքի՝ բիզնես սուբյեկտների ավելացման մասով»:
ՀԱԱ նախագահ Վազգեն Սաֆարյանը նկատում է՝ ցանկացած հեղափոխության ժամանակ տնտեսությունը հետընթաց է ապրում, դրանից հետո՝ սկսում է զարգանալ: Սա կախված է նրանից, թե հեղափոխությունն իր մեջ ինչ է պարունակում՝ սոցիալտնտնտեսական քաղաքականության մեջ արմատական փոփոխություններ պարունակելիս ադապտացիոն շրջանը տնտեսության մեջ արագ չի զարգանում:
Զրուցակիցս վստահ է՝ տնտեսական արմատական ու ճիշտ փոփոխություններ կատարելիս մոտ ապագայում արդյունք կլինի, բայց ոչ՝ միանգամից, այլ՝ քայլ առ քայլ: