Հանրային ռադիոյի լրագրող, պրոդյուսեր Վրույր Թադևոսյանի նկատմամբ բռնության դեպքի առթիվ ոստիկանության Նոր Նորքի բաժնում նյութեր են պատրաստում քրեական գործ հարուցելու համար:
Ապրիլի 22-ին Ավան-Աճառյան փողոցի վրա «Ֆորդ սերվիսի» մոտ դիմակավորված անհայտ անձինք հարձակվել էին լրագրողական աշխատանք կատարող մեր գործընկերոջ վրա: Նրանք մահակներով ջարդել էին լրագրողի մեքենան, հարվածել նրա գլխին, վնասել և հափշտակել Վրույրի հեռախոսն ու iPad-ը:
Այս ամենը տեսանկարահանվել է ուղիղ եթերում, որի ընթացքում նաև լսվում է, թե ինչպես են դիմակավորված անձինք սպառնալիքներով ստիպում, որ լրագրողը դադարեցնի նկարահանումը:
Վրույր Թադևոսյանն այդ տարածքում էր դիմակավորված անձանց կողմից ճանապարհի այդ հատվածը փակելու, երթևեկությունը կառավարելու և քաղաքացիների նկատմամբ բռնություն գործադրելու դեպքերը լուսաբանելու համար:
«Ամեն ինչ շատ հանկարծակի տեղի ունեցավ: Միանգամից մահակներով հարձակվեցին մոտ 15 հոգի ու սկսեցին ջարդուփշուր անել: Մի քանի հարված հասցրին գլխիս, մեքենաս ավերեցին, հայհոյում էին, սպառնում, ստիպում լքել տարածքը: Տեսանյութում էլ երևում է՝ ես ներկայանում եմ որպես լրագրող, փորձում եմ հասկանալ, թե ինչ է կատարվում, բայց ապարդյուն։ Եղավ այն, ինչ եղավ»,- պատմում է Վրույր Թադևոսյանը:
Նրա խոսքով՝ ըստ փորձագիտական տվյալների՝ միայն մեքենային հասցված վնասը կազմում է 600 հազ. ՀՀ դրամ: Ջարդել են դիմապակին, հետևի մեծ ապակին, տանիքը, հայելիները, վնասել ձախակողմյան դռները:
