Երևանի Մեսրոպ Մաշտոցի անվան Մատենադարանում «Ավրորա» մարդասիրական նախաձեռնության համահիմնադիրներն այսօր ներկայացրել են 2018թ. «Ավրորայի» հերոսների անունները. «Ավրորա» մրցանակի մեկ միլիոն դոլարի պարգևի առաջադրված երեք նվիրյալների երկար սպասված անունները:
«Ավրորա» մրցանակը ճանաչման է արժանացրել երեք մարդասերների՝ Հնդկաստանում սեռական բռնությունների դեմ պայքարող Սունիտա Քրիշնանին, Մյանմայում ռոհինջա ժողովրդի իրավունքների պաշտպան, իրավաբան Չո Լա Աունին և Հեկտոր Թոմաս Գոնսալես Կաստիլիոյին՝ Մեքսիկայում կենտրոնաամերիկացի փախստականներին ապահով ապաստան տրամադրելու գործում ցուցաբերած անձնուրաց նվիրումի համար:
«Ավրորա 2018»-ի հերոսների անուններն այսօր ներկայացրին նախաձեռնության համահիմնադիրներ Նուբար Աֆեյանն ու Ռուբեն Վարդանյանը: Երեք մարդասերները մեծարման կարժանանան «Ավրորա» մրցանակի շնորհման երրորդ հանդիսավոր արարողությանը, որը տեղի կունենա 2018 թվականի հունիսի 9-ին Երևանում:
Առաջադրված երեք գործիչներից մեկը հունիսի 10-ի արարողության ընթացքում կդառնա դափնեկիր և կպարգևատրվի ինչպես 100 000 դոլարով, այնպես էլ մեկ միլիոն դոլար դրամաշնորհ կստանա՝ աջակցելու համար իրեն ոգեշնչած ու գործի մղած կազմակերպություններին: «Ավրորայի» համահիմնադիր Ռուբեն Վարդանյանն այսօր խոսեց կարոևր նախաձեռնության մասին, որի մեկնարկը, ըստ նրա, տրվել էր հենց այսօր.
«Մատենադարանում այսօր բացվեց մատյան, որտեղ կհավաքագրվեն ու սերունդների համար կպահպանվեն Ավրորայի հերոսների անունները»:
750 հայտ՝ 115 երկրից. տարեցտարի ընդլայնվում ու բազմազան է դառնում Ավրորայի աշխարհագրությունը «Ուրախ եմ, որ ապրիլի 24-ին մենք խոսում ենք համաշխարհային ծրագրի մասին: Մենք այսօր առնչվում ենք մեր պատմութայն ցավոտ էջին, բայց այդ էջը մեզ նաև ուժ է տվել՝ կանգնելու այստեղ և խոսելու այդ մասին»,-ասաց Ավրորայի համահիմնադիր Ռուբեն Վարդնայանը: Նուբար Աֆեյանի խոսքով՝ չնայած Հայաստանում ընթացող ներքաղաքկան զարգացումներին ու լարվածությանը, ապրիլի 24-ը մեկ անգամ ևս ամրագրվեց որպես ազգային միասնության օր:
«Ավրորան» կշարունակի իր գործը Հայոց ցեղասպանությունը վերապրածների անունից եւ ի երախտագիտություն նրանց փրկողների՝ վերապրածների ժառանգների կողմից, որոնք ցանկանում են երախտագիտությունն արտահայտել գործով:Նախաձեռնության ամենամյա եռօրյա միջոցառումները տեղի կունենան 2018թ. հունիսի 8-10-ը: Աշխարհում գոյություն ունեցող մարդասիրական ամենահրատապ խնդիրներին լուծումներ փնտրելու եւ մարդասիրությունը փառաբանելու համար Հայաստանը կհախմբի հումանիտար ոլորտի ամենահեղինակավոր գործիչներին:
