«Ազատության ջահը»՝ ծխարձակիչներով. քաղաքական ակցիա՞, թե՞ շոու
Այսօր ԱԺ-ն միաձայն՝ 95 կողմ ձայնով վավերացրել է Հայաստանի և Եվրոպական միության միջև Համապարփակ և ընդլայնված գործընկերության մասին համաձայնագիրը։ Կողմերը փաստաթուղթը ստորագրել են 2017 թվականի նոյեմբերի 24-ին, Բրյուսելում՝ ԵՄ Արևելյան գործընկերության գագաթնաժողովի շրջանակում:
«Իր տեսակի մեջ այս կարևոր փաստաթուղթը նոր էջ է բացում ՀՀ-ԵՄ հարաբերություններում` քվեարկությունից հետո Ֆեյսբուքում գրել է Ազգային ժողովի արտաքին հարաբերությունների հանձնաժողովի նախագահ Արմեն Աշոտյանը, նաև հավելել, որ պետք է անել հնարավորը՝ համաձայնագրի արդյունավետ իրագործման ու դրա ընձեռած բոլոր հնարավորությունները ճիշտ կիրառելու համար:
Համաձայնագիրը միաձայն՝ 95 կողմով ընդունելուց հետո խորհրդարանն այսօր անցել է «Առևտրի և ծառայությունների մասին» օրենքում կառավարության առաջարկած փոփոխությունների քննարկմանը: «Ելք» խմբակցության պատգամավոր Արարատ Միրզոյանի ելույթը անակնկալի է բերել դահլիճում ներկա սակավաթիվ պատգամավորներին: ԱԺ նիստերի դահլիճը մի քանի րոպե ողովել է գունավոր ծխով: Պատգամավորներից մի քանիսը ակցիան հիմարություն են որակել, մյուսները՝ ըմբոստության քայլ:
ԵՄ-Հայաստան համաձայնագրի քվեարկությանը դահլիճում ներկա էր 95 պատգամավոր, դրան հաջորդած քննարկմանը՝ մասնակիցների թիվը ավանդույթի համաձայն մի քանի անգամ կրճատվեց:
Պատագամավորները հանգիստ քննարկում էին «Առևտրի և ծառայությունների մասին» օրենքում կառավարութան առաջարկած փոփոխությունների նախագիծը՝ հիմնականում ողջունելով, որ կառավարությունը որոշել է սահմանափակել ժամանցի որոշ վայրերի գործունեությունը, օրինակ սահմանել, որ դիսկոտեկներն ու տարատեսակ ակումբները պետք է բնակելի շենքերից հեռու տեղակայվեն:
Պատգամավորները հարցեր էին տալիս, հետո ելույթների հերթն էր: 4 հերթագրվածներից երրորդը Ելք-ից Արարատ Միրզոյանն էր, Նա մոտեցավ ամբոիոնին ու կտրուկ փոխեց քննարկման թեման ու ԱԺ մթնոլորտը:
«ՀՀ ազատ քաղաքացիներ, եկել է պահը , երբ մենք կարող ենք կանխել Սերժ Սարգսյանի 3-րդ ժամկետի իշխանավորումը, դրա համար անհրաժեշտ է ապրիլի 13-ին գալ Ազատության հրապարակ, որտեղ մենք միասին կվառենք Ազատության ջահը»:
Միրոզյաին միացավ Լենա Նազարյանը, երկուսով վառեցին իրենց ձեռքի ծխարձակող ճայթուկները, ԱԺ նիստերի դահլիճը ողովեց գունավոր ծխով:
Մի քանի րոպե դահլիճը ծխի մեջ էր ու մինչ ծուխը կցրվեր, նույն Ելքից մեկ այլ պատգամավոր Գևորգ Գորգիսյանն առաջարկեց ընդմիջում վերցնել:
«Պարոն Գորգիսյան, ինչ ընդմիջում, դուք , ձեր խմբակցությունը… Թող հանրությունը որոշի՝ ով ինչով է զբաղված պառլամենտում»:
Ակցիայից հետո Արարատ Միրզոյանը լրագրողներին տեղեկացրեց, որ ծուխն անվնաս էր, իսկ նպատակը «Իմ քայլը» նախաձեռնության նկատմամբ ուշադրություն հրավիրելն էր: Պատգամավորներից շատերը, սակայն, ակցիան չգնահատեցին, ՀՀԿ-ից Շուշան Պետրոսյանի կարծիքով , օրինակ, տեղի ունեցածն ընդհանրապես ակցիա չէր, Գագիկ Մինայանի կարծիքով ՝ հիմարություն էր:
ԱԺ նախագահ Արա Բաբլոյանի արձագանքը ոչ միայն խոսնակի անունից էր , այլ նաև բժշկի տեսանկյունից:
Միանշանակ չէր Ելք դաշինքի մյուս թևի արձագանքը: «Լուսավոր Հայաստանը» ներկայացնող պատգամավորները նշեցին, որ իրենք ակցիայից տեղյակ չէին: Ընդունում էին այն թե ոչ՝ այդքան էլ պարզ չէր: Մանե Թանդիլյանը թեև առաջարկեց ակցիան չհեգնել, բայց վստահ չէր, որ այն վտանգավոր չէ:
Ուշագրավ էր, որ ակցիան տեղի ունեցավ այն օրենքի քննարկման ժամանակ, որով առաջարկվում է սահմանափակել ծառայության որոշ օբյեկտների գործունեությունը: Մասնավորապես սահմանել, որ դիսկոտեկները, կարաոկեները, սաունաները և տարատեսակ այլ ակումբներ չեն կարող տեղակայվել բազմաբնակարան շենքի կամ դրան հարակից տարածքում, ինչպես նաեւ կրթական եւ պատմամշակութային հաստատություններին մոտ:
Այն օբյեկտները, որոնք արդեն տեղակայված են, 1 տարի ժամանակ այլ վայրեր տեղափոխվելու համար: Օրենքով խստացվում են պահանջները չբավարերլու, ինչպես նաև գիշերային սահմանված ժամերին լռությունը չպահպանելու տուգանքները:
Ի դեպ, ակցիայով ընդհատված, հետո վերսկսված քննարկման ժամամաակ ՀՀԿ-ական Արայիկ Գրիգորյանը հիշեց հրավառությունները սահմանափակող օրենքը՝ ափսոսանք հայտնելով, որ արգելվող տարածքների մեջ չեն մտածել ներառել նաև ԱԺ նիստերի դահլիճը: