PhotoPodium.com կայքը Երևանում ներկայացնում է իր 10-ամյակին նվիրված հոբելյանական «PHOTOPODIUM.COM-մենք 10 տարեկան ենք» լուսանկարչական նախագիծը:
Դրա շրջանակում Երևանում այսօր բացվել է Մոսկվա-Թբիլիսի-Երևան շարժական լուսանկարչական ցուցահանդեսը: Ֆոտոպոդիումի մասնակիցներից յուրաքանչյուրը մեկական աշխատանք է ներկայացնում: Դրանք շուրջ 80-ն են:
Եթե լուսանկարիչներն ունենային իրենց թանգարանը Երևանում, այսօրվա «PHOTOPODIUM.COM – մենք 10 տարեկան ենք» լուսանկարչական նախագծի միջազգային ցուցահանդեսը կբացվեր հենց այդտեղ: Բայց քանի որ լուսանկարչության թանգարան չկա, նման ցուցահանդեսների համար նաև վայր գտնելն է խնդիր դառնում: Իսկապես արժեքավոր բազմաթիվ լուսանկարներ այսօր ժամանակավորապես հանգրվանել են պատմության թանգարանում: Հասարակությունը պետք է դրանց ծանոթանա ինչպես ժամանակավոր, այնպես էլ մշտական ցուցադրությունների միջոցով, նկատում է «photopodium.com» լուսանկարչական կայքի հայաստանյան ներկայացուցիչ, լուսանկարիչ Արմեն Ենգոյանը: Ի վերջո լուսանկարչությունն էլ է արվեստ և բավականին լուրջ, ասում է:
Այսպիսով՝ իսկապես արժեքավոր նմուշները մեկ վայրում ի մի բերելու լուսանկարիչների խնդրանքը տարիներ շարունակ արձագանք չի ստանում: «Հայ լուսանկարիչներ» գրքի հեղինակ, լուսանկարիչ Վահան Քոչարը մեկ անգամ չէ, որ դիմել է պատկան մարմիններին:
Թե ինչ ընթացք է ստացել քաղաքապետի այս խոստումը, հետաքրքրվեցինք հենց քաղաքապետարանից: Այստեղից մեզ հայտնեցին, որ լուսանկարչական թանգարան բացելու ծրագիրն արդեն քննարկման փուլում է: Ի դեպ՝ լուսանկարիչները բացի քաղաքապետից դիմել են նաև մշակույթի նախարարություն:
Մշակույթի նախարարությունից էլ «Ռադիոլուրի» վստահեցրին, որ թանգարանի հիմնադրումն օրակարգում է: Այլ մեկնաբանություններ չտվեցին, թեև լուսանկարիչները մեկ վերապահում ունեն. կարծում են, որ սխալ է լուսանկարչական թանգարանը ինչ որ մեկի անունով կոչելը: Որպեսզի ոչ ոք չնեղանա, այն պետք է անվանական չլինի: Պարզապես կոչվի լուսանկարչական թանգարան:
