Նախօրեին Մոսկվայի մարզում ԱՆ-148 ինքնաթիռի աղետից զոհված ուղեւոր Վարսիկ Սեւոյանը հաշվառված է Գեղարքունիքի Զոլաքար համայնքում, սակայն ընտանիքի հետ երկար տարիներ ապրել է Ռուսաստանի Օրսկ քաղաքում: Ընտանիքով օրերս եղել են Կրասնոդարում՝ ասում է Վարսիկի ամուսնու եղբայրը՝ Իշխան Մարտոյանը: Դեռևս հայտնի չէ, թե որտեղ կհուղարկավորեն նրան՝ «Ռադիոլուր»-ին հայտնեց Իշխան Մարտոյանը:
Աղետից զոհվել էր նաեւ մեր մեկ այլ հայրենակից՝ երկրորդ օդաչու Սերգեյ Համբարյանը։ Մեր աղբյուրները նշեցին, որ Համբարյանը հայկական ավիացիայում չի աշխատել։ Ռամենսկի շրջանում ինքնաթիռի կործանումից հետո շարունակվում են որոնողական աշխատանքները: Նախնական տվյալներով՝ կործանման պատճառը շարժիչներից մեկի խափանումն է ու դրան հաջորդած բռնկումը:
«Օդաչուների ազգային միավորում» հասարակական կազմակերպության ղեկավար Դմիտրի Ադբաշյանը փոխանցեց՝ թռիչքից առաջ ինքնաթիռը չի պատրաստվել: Վատ եղանակային պայմանների դեպքում ինքնաթիռի թևերի և ամբողջ մասերի վրա կարող է առաջանալ սառույց, իսկ թռիչքից առաջ օդանավերը պետք է անպայման հատուկ հեղուկով լվացվեն, ասում է:
«Այդ բանը չեն արել, ու ես կասկածում եմ, որ закрылки, прикрылки: Դրանք հետևի ու առաջի թևերի այն մասերն են, որոնք թռիչքից առաջ դուրս են հանում, հետո թռիչքից հետո օդի մեջ հետ են հավաքում: հետ հավաքելուց ինքնաթիռի բարձման ուժը միանգամից ընկնում է ու քանի որ սառույցի դեմ հեղուկով ինքնաթիռը լվացված չէր, ինքնաթիռը ընկավ»:
Այն հրապարակումները, որ շարժիչները շարքից դուրս են եկել, ըստ Խորհրդային Միության վաստակավոր օդաչու Դմիտրի Ադբաշյանի, դեռևս ապացուցված չէ, քանի որ հետևում է հրապարակումներին, որտեղ ասվում է, որ ընկնելուց հետո շարժիչներն աշխատել են:
Սովորաբար նման աղետներից հետո տվյալ երկրների դիվանագիտական ներկայացուցչությունների մոտ զոհվածների հիշատակին հարգանքի տուրք է մատուցվում։ Հայաստանում Ռուսաստանի դեսպանատան մոտ այսօր սովորական օր էր։
Մոսկվայից Օրսկ թռչող ինքնաթիռը երեկ Դոմոդեդովո օդանավակայանից թռիչքն իրականացնելուց կարճ ժամանակ անց կորել էր ռադարների տեսադաշտից: Սարատովի ավիաընկերությանը պատկանող ինքնաթիռի անձնակազմի 6 անդամներն ու 65 ուղևորեւրները զոհվել են։
