7% տնտեսական աճն ու աճող աղքատությունը
Ազգային վիճակագրական ծառայության տվյալներն ավելի քան հուսադրող են՝ մոտ յոթ տոկոս տնտեսական աճ՝ 2017թ: Դրանից, սակայն, աղքատությունը չկրճատվեց, մարդկանց գնողունակությունն էլ չբարձրացավ: Սա տնտեսագետների մի մասի գնահատականն է:
Նրանք կարևորում են պատասխանատվության ինստիտուտի ներդրումը: Իշխող քաղաքական ուժում խոստանում են՝ 2018թ ապրիլից հետո խորհրդարանական կառավարման համակարգում պատասխանատվության կենթարկվեն կառավարության վատ աշխատող անդամները:
Կոալիցիոն գործընկեր ՀՅԴ-ում, Հայաստանի վարչապետ Կարեն Կարապետյանի կառավարության իրականացնող քաղաքականությունը ճիշտ են համարում: Սակայն, ԱԺ ՀՀԿ խմբակցության քարտուղար Գագիկ Մելիքյանի խոսքով, իրենց մոտ դեռ չի քննարկվել այն հարցը, թե՞ կմնա Կարեն Կարապետյանը վարչապետի պաշտոնում, թե՞ ոչ:
2017 թ Հայաստանի տնտեսությունը փակեց վերջին տարիների համար աննախադեպ տնտեսական աճով՝ 2016-ին գրանցված զրոյական աճի դիմաց: ԱԺ ՀՀԿ խմբակցության քարտուղար Գագիկ Մելիքյան.
«Անցյալ տարի 7,7 տոկոս ՀՆԱ-ի աճ արձանագրեցինք, ՏԱՑ 12 տոկոս: Սա կարևորում են, սրան հասնելը այնքան էլ հեշտ չէր: Հայաստանը տարածաշրջանում միակ երկիրն էր, որն ապահովեց նման ցուցանիշ»:
ՀՀԿ-ի կոալիցիոն գործընկեր Հայ հեղափոխական դաշնակցության Տնտեսական հետազոտությունների գրասենյակի պատասխանատու Սուրեն Պարսյանը տնտեսական ցուցանիշից գոհ է՝ այն խոստացված հինգ տոկոսից ավելին է, սակայն ներառական աճ չարձանագրվեց. «Աղքատության կրճատում, եկամուտների բևեռացվածության նվազում»:
Հայաստանի գործատուների հանրապետական միության նախագահ Գագիկ Մակարյանը Հայաստանի տնտեսությունում դրական տեղաշարժեր տեսնում է՝ ստվերի կրճատում, կառավարման որակի բարձրացում, կոռուպցիայի դեմ պայքար ու անհավասար մրցակցության սահմանափակում: Նշված բոլոր ուղղություններում էլ աշխատանքները նկատելի են, միաժամանակ ընդգծում է՝
«Անհավասար մրցակցություն հիմա էլ կա»:
Փորձագետները վստահեցնում են՝ ներառական աճ ունենալու համար ժամանակ է պետք, անգամ՝ տարիներ: Այդուհանդերձ, ՀԳՄՆ Գագիկ Մակարյանը չի բացառում, որ 2017-ի վերջնական արդյունքները ամփոփելիս մոտ երկու տոկոսով գուցե գործազրկության մակարդակի նվազում արձանագրվի: Սակայն Հայաստանն ունի սոցիալական ապահովության ամենացածր ցուցանիշը տարածաշրջանում։ Գագիկ Մակարյանը կարևորում է պատասխանատվության ինստիտուտի ներդրումը:
«Վատ աշխատող նախարարներին պատասխանատվության ենթարկել»:
Կոալիցիոն գործընկերները միասին ընդգծում են՝ 2018թ ապրիլից հետո կառավարության անդամները պետք է հասկանան, որ իրենք են պատասխանատվություն կրելու իրենց արարքների համար: Խորհրդարանական կառավարման համակարգում օրենսդիր մարմնում իշխող ուժը պատասխանատվության կկանչի կառավարության վատ աշխատող անդամներին: