Տնտեսական

Ինչից է աղտոտվել Դեբեդը. «Vallexgroup»-ի պատասխանը «Ռադիոլուրին»

«Vallexgroup» ընկերության պատասխանը «Ռադիոլուրին»: Արդյո՞ք Դեբեդ գետն աղտոտվել է հենց այս ընկերության պոչամբարի վնասի հետևանքով: Պաշտոնական ու ոչ պաշտոնական պարզաբանումները տարբեր են:

Փորձագետները պնդում են՝ ոչ միայն այս, այլ նաև մյուս բոլոր պոչամբարները տեխնիկական սխալներով են կառուցվել, ուստի և վտանգավոր են, հանքարդյունահանողները պնդում՝ պոչանքները գտնվում են խիստ վերահսկողության տակ։

Իրականությունը փորձում է պարզել «Ռադիոլուրը»:

Հայկական լրատվամիջոցներում պարբերաբար հրապարակումներ են հայտնվում՝ Թեղուտի հանքավայրի շահագործման արդյունքում պոչամբարի պատվարի  վնասման  հետևանքով թափոնները լցվում են Շնող գետ, այնտեղից էլ՝ Դեբեդ: Օրերս նման ահազանգ նորից հնչեց:

«Ռադիոլուրն» էլ պարզաբանումներ խնդրեց հանքարդունահանող ընկերությունից։ Նախ՝ մեզ հետաքրքրում էր, թե որքան է լցված Թեղուտի պոչամբարը:

«10.01.2018թ. դրությամբ պոչամբար են մատակարարվել 21.8 մլն տոննա պոչեր: Պոչամբարի նախագծային տարողունակությունը կազմում է 198 մլն մ»:

Ընկերությունից փորձեցինք տեղեկանալ՝  արդյո՞ք այն վնասվել է:
«Ոչ: Թեղուտ ՓԲԸ պոչամբարի վնասվածության մասին լուրերը չեն համապատասխանում իրականությանը: Պոչամբարի պատվարի վրա որևէ վթարային իրավիճակ գոյություն չունի»:

Հնարավո՞ր է, որ պոչմաբարը վնասվի, սակայն հնարավոր չլինի պարզել: Ընկերությունում վստահեցնում են՝

«Պոչապատվարը, հանդիսանալով բարդ հիդրոտեխնիկական կառույց, գտնվում է մշտական հսկողության տակ: Պարբերաբար վերահսկվում են պատվարի կայունության մի շարք ցուցանիշներ ոչ միայն մեր, այլ՝  միջազգային հեղինակություն ունեցող փորձառու ճարտարագիտական ընկերությունների կողմից: Բացառվում է որևէ վթարային իրավիճակի զարգացում առանց այդ փաստի՝ վերահսկող խմբերի կողմից արձանագրման»:

Ուստի «Վալեքսգրուպը» հավաստիացնում է, որ Դեբեդ գետն իրենց մեղքով չի աղտոտվում։

Իսկ ընդհանրապես՝ այժմ աղտոտված է, հետաքրքրվեցինք Շնող խոշորացված համայնքի ղեկավար Դավիթ Ղումաշյանից:

«Ռադիոլուրի» մյուս զրուցակիցը Թեղուտի բնակիչ Սամվել Նորեկյանն է: Նշում է՝ մոտ մեկ ամիս է, ինչ գործարանը չի աշխատում, ուստի և այն չէր կարող այդ օրերին գետի ջուրը պղտորվել:

Աշխարհագրագետ, Հայկական բնապահպանական ճակատի անդամ Լևոն Գալստյանը «Ռադիոլուրին» մտահոգություններն է փոխանցում ոչ միայն այս պոչմաբարի հետ կապված: Ասում է՝ բոլոր տեղերում էլ մենք նմանատիպ ու համարժեք խնդիրներ ունենք: Մասնավորեցնելով նշում է՝

«Թեղուտի պոչմաբարի մասին հստակ գրված է՝ այն վտանգավոր է թե տեխնիկական, թե բնապահպանական առումներով: Պատվարի կառուցման մեթոդիկան ճիշտ չի ընտրված, անընդհատ  լինում են խոնավացման ջրերի արտահոսքի խնդիրներ: Կայունությունը կարող է վտանգվել հետագայում, երբ  պոչամբարը դուրս գա շահագործումից, լցված լինի ոչ մեկը իրեն չհետևի»:

Զրուցակիցս պնդում է՝ Հայաստանում  որևէ պետական մարմին ուսումնասիրություն չի կատարել, թե ինչ վիճակում են պոչամբարները՝ ինչպես շահագործվող, այնպես էլ՝ արդեն  չշահագործվող: Ուստի և հենվում ենք  ՀԲ ֆինասնավորմամբ  2016թ կատարած  շվեդ երկրաբանների  ուսումնասիրության վրա:

«Բոլոր պոչամբարները սխալ են կառուցված սեյսմիկ  երկրի պայմանները հաշվի առնելով՝ կառուցման մեթոդը սխալ է, և չի կարող կայուն լինել մեր տիպի լեռնային երկրների համար»:

Բնապահպանության նախարարությունն արդյո՞ք Հայաստանի պոչամբարների հետ կապված որևէ հետազոտություն կատարել է՝ հարցնում եմ  Ընդերքի և հողերի պահպանության քաղաքականության վարչության պետ Վիգեն Ավետիսյանին:

«Ոչ, 2018թ Բնապահպանության նախարարությունը պետք է գույքագրի բոլոր չգործող պոչամբարները»:

Արդյունքները պարզ կլինեն տարեվերջին:

Back to top button