Մշակույթ

Տիկնիկների պատկերասրահն այսօրվանից նոր հասցե ունի

2017-ի մարտից  Երևանի՝  Աբովյան 1/1 հասցեում գործող  Տիկնիկների պատկերասրահն ունի նոր հասցե: Թումանյան 11 հասցեում փոքրիկ այցելուների առջև Պատկերասրահն իր դռները կբացի հունվարի 22-ից: Նոր հասցեում՝ նոր գաղափարներով. առաջիկա ծրագրերի թվում անդրադարձն է հայկական մոռացված ծեսերին, ծիսական տիկնիկների ստեղծման պատմությանը:  

 

Երեխաների այցելության համար այս տարածքն անհամեմատ հարմար է, իսկ ներքին միջավայրն՝ ավելի տրամադրող` ասում է Երևանի Աբովյան 1/1 հասցեից Թումանյան 11 տեղափոխված Տիկնիկների պատկերասրահի տնօրեն Ստելլա Սարգսյանը: Նոր հասցեում Պատկերասրահն իր դռներն այցելուների առջև  կբացի հունվարի 22-ից:

«Այս տարածքում ունենք չորս  սրահ՝ հայկական ծիսական տիկնիկների, եվրոպական տիկնիկների (Ալիս Նավասարգյանի հավաքածուն), հուշանվերային տիկնիկների, որտեղ ժամանակի ընթացքում կստեղծվի  նաև Փարաջանովի անկյունը: Չորրորդ սրահը ներքնահարկում է, որտեղ կգործի մեր մանկական կենտրոնը»,- ասում է տնօրենը։

Նշված մանկական  կենտրոնում անցկացվելու են վարպետության եռամսյա դասընթացներ  հայտնի տիկնիկագործների մասնակցությամբ: Տիկնիկագործության գաղտնիքներին կարող են ծանոթանալ յոթ տարեկանից բարձր բոլոր ցանկացողները: Տնօրենի խոսքով, Պատկերասրահի մանկական կենտրոնը նաև հրաշալի ժամանցային վայր է, որտեղ երեխաներն անցկացնում են մի քանի ժամ, իսկ այնտեղից հեռանում իրենց ձեռքով պատրաստած տիկնիկներով, տիկնիկներով պատկերազարդ շապիկներով:

Նոր հասցեում՝ նոր գաղափարներով. առաջիկա ծրագրերի թվում անդրադարձն է հայկական մոռացված ծեսերին, ծիսական տիկնիկների ստեղծման պատմությանը: «Ամեն ինչ կփորձենք ներկայացնել խաղի միջոցով, որպեսզի  երեխայի մեջ  տպավորվի տեսածը: Այժմ աշխատանք ենք տանում, որպեսզի ներկայացնենք ոչ միայն հայկական, այլև ուրիշ երկրների ազգային ծեսերն ու տիկնիկները: Այդ ուղղությամբ մենք փորձեցինք համագործակցել Հայաստանում Չինաստանի դեսպանատան հետ, բայց Պատկերսարահի նախկին տարածքը թույլ չտվեց իրականացնել մեր գաղափարը: Հուսամ, որ նոր հասցեն նոր հնարավորություններ կստեղծի»,- նշում է Ստելլա Սարգսյանը:

Գործունեության կարճ ժամանակահատվածում Տիկնիկների պատկերասրահը հասցրեց դառնալ մայրաքաղաքի մշակութային «գայթակղիչ» հասցեներից մեկը: Նախկին փոքրիկ տարածքում, ըստ տնօրենի, այցելուների խնդիր  չեն ունեցել: «Հետաքրքրությունը շատ մեծ էր: Մարդիկ անընդհատ գալիս էին: Մեծ հոսք կա նաև մարզերից: Երեխաները գալիս էին դասարաններով: Այցելուների՝ մեր ֆեյսբուքյան էջում թողած գրառումները ևս փաստում են, որ Պատկերասրահն իսկապես սիրելի անկյուն էր դարձել: Մեր  գործունեության մի քանի ամիսների դադարի ընթացքում անընդհատ հեռախոսազանգեր ենք ունեցել: Մարդկանց հետաքրքրությունը վստահություն է ներշնչում, որ գաղափարը հաջողված է»:

Թումանյան փողոցում առաջիկայում կհայտնվի Տիկնիկների պատկերասրահի նոր հասցեն «հուշող» ցուցանակ: Մուտքի անմիջական հարևանությամբ «հուշաշարի» առաքելությունն իրականացնում է ծաղրածուի ուրախ քանդակը:

Պատկերասրահը կաշխատի 11:00-ից մինչև ժամը 20-ը (ամռանը՝ մինչև 22:00-ն)՝ առանց հանգստյան օրերի: Ուրբաթ օրերին՝ երեկոյան 19:00-ից հետո, Տիկնիկների պատկերասրահի փոքրիկ այցելուները նաև թատերական ներկայացում դիտելու, ավելին՝ դրանց մասնակցելու հնարավորություն կունենան:

 

 

Back to top button