Հասարակություն

Քաղաք, որտեղ համառորեն հավատում ու շարունակելու են  հավատալ Ձմեռ պապիկին

Քաղաք, որտեղ կարողանում են զարմացնել ու անվերապահորեն հավատալ Ձմեռ պապին՝ անկախ տարիքից՝ Գյումրի:

«Եթե չհավատայինք, 30 տարի ինչպես կապրեինք  այն ժամանակավոր վագոն-տնակներում, որոնց պիտանիության ժամկետն ընդամենը 2-3 տարի էր»,-կատակում է Գյումրու Վարդան Աճեմյանի անվան դրամատիկական թատրոնի տնօրեն Տիգրան Վիրաբյանը:

Վագոն տնակներում ոչ միայն ապրում են, այլև աշխարհի, Եվրոպայի չեմպիոններ ծնում, ծնում արվեստագետներ, գիտնականներ, զինվորականներ, որոնք երկրի գլխավոր երակն են դառնում ու թարմ արյուն մատակարարում:

Ռադիոլուրի տարեվերջյան անդրադարձը նվիրված է արվեստների ու արհեստների, հերոսների ու չեմպիոնների, իսկ եթե ավելի դիպուկ՝ ամենահամառների  քաղաքին՝ Գյումրիին:

 

Մշակույթով գերհագեցած մայրաքաղաքից 2017-ին մշակութային էպիկենտրոնն ավելի ու ավելի հաճախ էր տեղափոխվում հանրապետության երկրորդ քաղաք, կամ ինչպես տեղացիներն են ասում՝ հայրաքաղաք Գյումրի:

Մշակութային սիրտն այստեղ բաբախում էր հատկապես Վարդան Աճեմյանի անվան դրամատիկական թատրոնում: Դրա մեղավորները թատրոնի ղեկը 2017-ին ստանձնած երկու խենթ երիտասարդներն էին՝ գլխավոր ռեժիսոր Լյուդվիգ Հարությունյանն ու տնօրեն Տիգրան Վիրաբյանը:

Գյումրու թատրոնի մասին հրաշքներ են պատմում, ինչպես հաջողվեց իրականացնել այդ հրաշքը, հարցիս տնօրենն արձագանքում է գյումրեցուն հատուկ՝ առանց ավելորդ համեստության:

«Երբ թիկունքիդ կա նման կոլեկտիվ, ամեն ինչ հնարավոր է»:

Իրենց գերազանցելու համար ինչ կանեն, դեռ չգիտեն, բայց մի բանում վստահ են՝ Գյումրին կապրի թատրոնով ու 2018-ը ևս կլինի թատրոնով լի իրադարձությունների տարի:

«Գյումրին միշտ է մշակույթով ապրել, բայց վերջին իրադարձություններն ավելի են աշխուժացրել քաղաքի  մշակութային կյանքը»,-ասում է թատրոնի տնօրեն Տիգրան Վիրաբյանը:

Իսկ նրա մատնանշած «վերջին իրադարձությունների» թվում, իհարկե, նախ «Կումայրի» պատմամշակութային տարածքի, այսպես ասած՝ հին Գյումրու  վերականգնման ծրագիրն էր:

Գյումրեցիների բնորոշմամբ՝ «բուլկի» քարերով վերակառուցված «Ռուսթավելի» փողոցում այսօր անընդհատ զբոսաշրջիկների կհանդիպեք:

«Նրանց շքեղ հյուրանոցներով զարմացնել չենք կարող, զարմացնում ենք հին Գյումրվա կոլորիտով»,-ասում է գյումրեցի զրուցակիցս: 2017-ին Գյումրու նշանավոր իրադարձություններից էր նաև «Հոկտեմբեր» կինոթատրոնի վերանորոգումը Գյումրին ու Ամանորը:

«Այն ինչ կապված է հյուրասիրության, հյուր գնալու և հյուր ընդունելու հետ, խիստ գյումրիական է: Այստեղ դեռ պահպանվում է յոթ որդով սեղան նստելու ավանադույթը, իսկ սեղան նստում են միայն ընտանիքի ավագից հետո»,-նկատում է զրուցակիցս: Գյումրեցու՝ Ամանորի պարտադիր ճաշացանկի մասին:

Այս ամենը հնարավոր է տեսնել միայն Գյումրիում, այնպես որ սուր զգացողությունների սիրահարներին Տիգրան Վիրաբյանը  խորհուրդ է տալիս Ամանորն անցկացնել միայն ու միայն հայրաքաղաքում:

«Չեք կարող չէ Երևանում գնալ մի վայր, որտեղ 35-ամյա կինը երկու ձեռքով ճեղքում է կովի գլուխը, և դուրս է սպրդում կովի լեզուն, որը շատ համեղ է». գյումրեցի զրուցակցիս գովազդային հիմնավորումն է:

Եվս մի բան, որը խիստ հատուկ է Գյումրիին ու գյումրեցիներին. այստեղ անվերապահորեն հավատում են Ձմեռ պաբին, այո՛, հենց Պաբին, գյումրեցիք ըդպես կըսեն: «Եթե չհավատայինք, 30 տարի ինչպես կապրեինք  այն վագոն-տնակներում, որոնց պիտանիության ժամկետն ընդամենը 2-3 տարի էր»,-ասում է Տիգրանը:


Գյումրեցիները հավատում ու շարունակելու են հավատալ Ձմեռ պապին, որովհետև դեռ 1500 ընտանիք ապրում է վագոն-տնակներում ու մեծ, շատ մեծ  ակնկալիք ունեն  Ձմեռ պապից ու 2018 թվականից:

Back to top button