Ամանորին, ամանորյա հեքիաթին ու Ձմեռ պապի գալուստի ակնկալիքով են սպասում մանուկները:
Ասածիս հավաստիքը Տավուշի մարզի Բաղանիս գյուղում այս օրերին կազմակերպված փոքրիկ բարեգործական ամենամյա ակցիան էր, որի ընթացքում Ձմեռ պապն ուղևորվել էր սահմանամերձ գյուղ՝ թոռնիկներին անձամբ նվիրելու իրենից խնդրածը:
Արդեն ավանդույթ է՝ Ամանորի նվերների բաշխումը սկսվում է Ձմեռ պապին ուղղված նամակով։
«Բարև, հարգելի՛ Ձմեռ պապիկ: Ես ամեն տարի մեծ ոգևորությամբ սպասում եմ Ձեր գալուն: Սիրելի, Ձմեռ պապիկ, ես շատ եմ ուզում և խնդրում եմ ձեզնից զգեստապահարան՝ իմ հագուստները դասավորելու համար, ինչպես նաև անկողնային պարագաներ՝ փափուկ վերմակ, նաև խնդրում եմ տոնական զգեստ՝ հանդեսների ժամանակ հագնելու և գեղեցիկ ներկայանալու համար: Կանխավ շնորհակալություն: Մեծ սպասումներով Նանե Ավագյան: Ձմեռ պապ, այնքան ոգևորվեցի, որ կոնֆետները մոռացա»:
Նամակի հեղինակը Տավուշի մարզի Բաղանիս գյուղի բնակիչ 7-ամյա Նանե Ավագյանն է: Սոցիալական վատ պայմաններում ապրող ընտանիքի փոքրիկի համար ցանկությունները հասկանալի են։
Բաղանիս գյուղի փոքրիկների նամակներով է այս տարի ողողվել Santaclaus.am կայքը: Հավատում են Ձմեռ պապին ու խնդրել են իրենց ցանկությունները դարձնել իրականություն: Բարի Ձմեռ պապն էլ, հատ առ հատ ծանոթանալով նամակներին, փորձել է թշնամու գնդակոծությունները մշտապես հաղթահարող երեխաներին իր այցով պարգևել երազներն իրականություն դարձնելու բերկրանքը: Դժվարին ու երկար ճանապարհը հաղթահարելով՝ Ձմեռ պապը բարեգործական ամենամյա ակցիայի կազմակերպիչների հետ հասել էր սահմանամերձ Բաղանիս: Ջերմ ու հյուրընկալ ընդունելությունը չուշացավ:
Կազմակերպիչները երեխաներից առավել շատ էին ոգևորված փոքրիկների ուրախությամբ: Փոքրիկ Նանեն ոգևորությունից չէր հասցնում բացել նվերները: Փափուկ անկողինը տեսնելուց հետո, ոչինչ այլևս հետաքրքիր չէր նրան: Հավատում էր ամանորյա հրաշքին ու երազանքների իրականացմանը: Ձմեռ պապն այս տարվանը կատարեց:
Իր նման շատ փոքրերի ցանկություններն էր ի կատար ածել: Արդեն 10 տարի է:
Ծրագիրը մեկնարկել է 2008 թվականից, երբ գտնվում էինք զինվորական ծառայության մեջ: Միտքը ծագել էր մեր ընկերներից մեկի մոտ, որ կարողանանք կազմակերպել նվիրահավաք Սիսիանի տարածաշրջանի երեխաների համար և ամենակարևորը այն էր, որ երեխաները նամակներ գրեին Ձմեռ պապին և ոչ թե ուղղակի մենք հավաքեինք նվերներ անանուն, անորոշ նվերներ, և բաշխեինք երեխաներին, ինչը որ կատարվում է ամենուր:
«Այո ձմեռ պապը փաստորեն կարողանում է բոլորի ցանկությունները կատարել»,- ասում է կազմակերպիչներից Մակար Եղիազարյանը:
