Հաջողություններ անբարենպաստ գյուղատնտեսական տարում
Արմավիրի մարզում ամփոփվել է գյուղատնտեսական տարին: Տարվա անբարենպաստ եղանակի ու ոռոգման ջրի սակավության պայմաններում արմավիրցինեը լավ բերք են ստացել, փաստում է Արմավիրի մարզպետ Աշոտ Ղահրամանյանը:
Բայց մարզի մի շարք գյուղացիական տնտեսություններ բնական աղետից որոշակի վնասներ են կրել: Ոռոգման ջրի բացակայոթյան պատճառով նրանք բերքի կորուստ ունեն: Հաջորդ տարում նախատեսվել է մարզում ավելացնել խորքային հորերի քանակը, գյուղացիներին էլ առաջարկում են անցնել կաթիլային ոռոգման համակարգին:
2017թվականն այնքան էլ նպաստավոր չէր գյուղատնտեսության համար: Տարին սկսվեց ցրտահարությամբ, կարկուտով, իսկ ամռան տապին՝ ոռոգման ջրի սակավությամբ, ինչն այնքան էլ խոստումնալից չէր լավ բերք ստանալու համար: Գյուղացին սրտնեղեց, բայց սկսեց կռիվ տալ հողի հետ: Ամռան կեսին ոռոգման ջուր չկար:
Ոռոգման ջրի պակաս կար Արմավիրի մարզի գրեթե բոլոր համայնքներում: Էջմիածնի տարածքի Բաղրամյան գյուղում ոռոգման ջրի պատճառով զգալի տարածքներ մնացել են անմշակ: Բաղրամյանցիները հույս ունեն, որ հաջորդ տարում համայնքում կլուծվի այս խնդիրը և իրենք էլ կունենան ոռոգման նոր ցանց և կզբաղվեն գյուղատնտեսությամբ:
Երաշտից գյուղատնտեսությունը փրկելու համար ոռոգման ջուրը համայնքներին տրվեց ժամանակացույցով: Ոլորտի մասնագետներն այն բացատրեցին Ախուրյանի ջրամբարում ջրի մակարդակի նվազմամբ, որն էլ չհագեցրեց բույսերիի ծարավը: Ախուրյանի ջրամբարից ոռոգվող համայնքների հողատարածքները ջրի փոխարեն լցվեցին ձկներով: Արմավիրի մարզպետ Աշոտ Ղահրամանյանն նշեց, որ ջրամբարում շուրջ 90 մլն խմ-ով նվազել էր ջրի քանակը, որի պատճառով Սևանից 100 մլն խորանարդ մետր ջրառով է կազմակերպվել Էջմիածնի և Արմավիրի մի քանի համայնքների գյուղատնտեսական նշանակության հողերի ոռոգումը:
Արմավիրի մարզպետը նշեց, որ գյուղատնտեսական տարին լավ են փակել, վիճակագրական տվյալներով նախորդ տարվա համեմատությամբ, բացի հացահատիկից, բարջար-բոստանային մշակաբույսերի, պտղի ու խաղողի արտադրության որոշակի աճ է գրանցվել:
Վիճակագրությունն ընդհանրացնում է մարզի գյուղատնտեսության հաշվեկշռային պատկերը, սակայն մի շարք գյուղացիական տնտեսություններ տուժել են բնական աղետներից ու բերք չեն ունեցել:
Սակավաջրության դեպքում գործի են դրվել խորքային հորերը: Մայիսյան համայնքի ղեկավար Եսայի Մովսիսյանը նշեց, որ գյուղի հողերը ոռոգվել են խորքային 10 հորի միջոցով: Կառավարության որոշմամբ նախատեսվել է իրենց գյուղում հորատել ևս մեկ խորքային հոր, որը շահագործելու դեպքում կոռոգի մոտ 40 հա հողատարածք:
Տուժած գյուղացիներին որոշակիորեն զիջվել են հատկացված պարարտանյութի, սերմացուի վճարները, ոռոգման ջրի և հողի հարկի վարձավճարների մի մասը:
Գյուղատնտեսության մեջ հաջողությունների հասնելու և ջուրը խնայողաբար օգտագործելու նպատակով կառավարության ծարգրերից է կաթիլային համակարգի անցումը: Կաթիլային համակարգի ներդրման համար գյուղացիներին առաջարկվում է նոր վարկեր: