Կենցաղային զանազան հրավառություններն ու կասկածելի ճայթրուկները ներկրումից մինչև սպառում որևէ ստուգման կամ վերահսկողության չեն ենթակվում:
«Ռադիոլուրը» փորձել է պարզել, թե որ գերատեսչության տիրույթում է պայթուցիկների վերահսկողությունը՝ ներկրումից մինչև սպառում: Արտակարգ իրավիճակների նախարարությունից հայտնել են, որ իրենք կապ չունեն ոչ դրանց ներմուծման, ոչ էլ վաճառքի հետ:
Տնտեսական զարգացման և ներդրումների նախարարությունից էլ փոխանցել են, որ խնդիրը բացառապես Արտակարգ իրավիճակների նախարարության տիրույթում է: Խնդրի մասին բազմիցս բարձրաձայնել է նաև Սպառողների միության նախագահ Արմեն Պողոսյանը։
Թերևս միակ հստակ պատասխանը, որը նրան հաջողվել է ստանալ Առողջապահության նախարարությունից է: Այստեղից հաստատել են, որ հրավառությունների և պայթուցիկների գործածությունը վտանգավոր է մարդու առողջության համար:
