Հասարակություն

Նոր սերունդը ավելի գրագետ է. եզդի ուսուցիչներ


Ազգությամբ եզդի ավելի քան 30  ուսուցիչներ ստացել են մայրենի լեզվի վերապատրաստման դասընթացների մասին փաստող վկայականներ:

ՀՀ ԿԳՆ կրթության ազգային ինստիտուտում անցկացվող դասընթացները ոչ միայն ուսուցիչների  վերապատրաստման, այլև փորձի փոխանակման լավագույն հարթակն է՝ «Ռադիոլուրի» հետ զրույցում նկատել է դասընթացների ղեկավար Հասան Թամոյանը:

Արդեն ավանդական դարձած դասընթացների շնորհիվ երեխաներն առավել գրաճանաչ կդառնան և կպահպանեն սեփական ինքնությունը:

Հայաստանի 50-ից ավելի բնակավայրերում դասավանդում են նաև եզդիերեն լեզու եւ գրականություն: Առավել արդյունավետ դասընթացներ կազմակերպելու նպատակով՝ եզդի ուսուցիչները պարբերաբար մասնակցում են վերապատրաստման դասընթացների:

Կրթության ազգային ինստիտուտում անցկացվող մեկշաբաթյա դասընթացները ոչ միայն ուսուցիչների վերապատրաստման, այլև փորձի փոխանակման լավագույն հարթակ են։ Ի վերջո՝ մեկ հարկի տակ են հավաքվում տարբեր համայնքերի ուսուցիչներ՝ «Ռադիոլուրի» հետ զրույցում ասել է ՀՀ վաստակավոր լրագրող, 1-12-րդ  դասարանի «Եզդիերեն լեզվի և գրականության» դասագրքի համահեղինակ, եզդի ուսուցիչների վերապատրաստման դասընթացների ղեկավար Հասան Թամոյանը:

Հասան Թամոյանը ուրախությամբ նկատեց, որ տարեց տարի մեծանում է ինչպես եզդի ուսուցիչների թիվը, այնպես էլ աշխարհագրությունը: Ձեռք բերելով նոր գիտելիքներ՝ դրանք փոխանցում են իրենց աշակերտներին:

Գիտակցելով այս կարևոր առաքելությունը՝ դասընթացներին մասնակցում են անգամ ամենահեռավոր մարզերի ուսուցիչները: Ի վերջո ոչ բոլոր եզդիներին է նման հնարավորություն տրված ուսանել և ուսուցանել մայրենի լեզուն և ազգային մշակույթը:

Զինե Հաջիյանը ոչ միայն դասընթացներին մասնակցելու համար է Ղուկասավանից հասել Երևան, այլև դասավանդելու համար է պարբերաբար գալիս մայրաքաղաք: Եզդիերեն է դասավանդում ինչպես Ղուկասավանում, այնպես էլ Զեյթուն վարչական շրջանի համար 137 դպրոցում:

Օմար Այիբյանն էլ Արմավիրի մարզի Լուկաշին գյուղից է: Եզդիերեն է դասավանդում 2006 թվականից:

Զրուցակիցս նաև նկատեց, որ նոր սերունդն առավել տառաճանաչ է, քան միջին կամ ավագ սերունդը: Եզդի երեխաներն այս դասընթացների  շնորհիվ ավելի ու ավելի գրաճանաչ կդառնան, կճանաչեն սեփական լեզուն ու մշակույթը:

Back to top button