Դպրոցում Գարդասիլի պատվաստման լուրը տնօրենը հերքում է
Հանրապետությունում արդեն մեկնարկել է պապիլոմա վիրուսի դեմ 13-ամյա աղջիկների պատվաստումները: Չնայած առողջապահության նախարարությունը քարոզում է արգանդի պարանոցի քաղցկեղը կանխարգելող պատվաստման արդյունավետությունն ու կարևորությունը, սակայն «Գարդասիլ» պատվաստանյութի վերաբերյալ հակասական կարծիքներ դեռ հնչում են:
Մինչ պատվաստման մեկնարկը, առողջապահության նախարարությունը հայտարարել էր՝ ինչպես բոլոր պատվաստումները` պապիլոմա վիրուսի դեմ պատվաստումը նույնպես իրականացվելու է բացառապես պոլիկլինիկաներում և ամբուլատորիաներում։
Սակայն լրագրող Արթուր Հովհաննիսյանն ահազանգ է ստացել, որ Շիրակի մարզի Այգաբաց համայնքի դպրոցում պատվաստումներն սկսվել են մինչ դեկտեմբերի 11-ը և այն իրականացրել են դպրոցում: Այդ ահազանգի հետքերով է գնացել նաեւ «Ռադիոլուրը»:
Հայաստանում կանանց քաղցկեղային հիվանդությունների մեջ կրծքագեղձի քաղցկեղից հետո երկրորդ տեղում է արգանդի պարանոցի քաղցկեղը: Ի դեպ՝ այս վարակով Հայաստանը դասվում է բարձր հիվանդացություն ունեցող երկրների շարքին: Հիվանդությունը կանխարգելելու նպատակով դեկտեմբերի 11-ից հանրապետությունում մեկնարկել է պապիլոմա վիրուսի դեմ անչափահաս աղջիկների պատվաստումը, որի վերաբերյալ հակասական կարծիքները բազմաթիվ են: Լրագրող Արթուր Հովհաննիսյանը ահազանգ էր ստացել Շիրակի մարզի Այգաբաց համայնքից, որ դպրոցում փորձել են մինչեւ ծրագրի մեկնարկը պատվաստում անել։
Դպրոցի տնօրեն Հռիփսիկ Հուրոյանը հերքում է լուրը։ Դպրոցում որեւէ պատվաստում չի արվել՝ շեշտում է. «Մեր մանկականի բժիշկը ընդամենը եկել, երեք րոպե հարցազրույց է անցկացրել ուսուցիչների և երկու ծնողների հետ, դպրոցում այդ ժամանակ երեխաներ չեն եղել: Դասերից հետո ես էլ ներկա չեմ եղել, դպրոցում եղել է գյուղի բուժքույրը»:
Համայնքի բուժքույր Ալվարդ Ինջյանը նշեց, որ, դպրոցում պատվաստման վերաբերյալ իրազեկման փոքրիկ միջոցառում են կազմակերպել 13 տարեկան աղջիկներ ունեցող երեք ծնողների և ուսուցիչների հետ: Պետք էր վերջիններիս ներկայացնել պատվաստանյութի կարևորությունը՝ ասում է:
«Դպրոցը պատվաստում էսքան ժամանակ ո՞վ է կատարել: Պատվաստումները մենք «Մոր ու մանկան» կենտրոնում կկատարենք հատուկ կաբինետում, բժշկի հսկողության տակ: Էն ել նոր եկած պատվաստում: Բացարձակ ոչ մի անգամ էդ պատվաստումը հլը չենք կատարել: Մենք դեղորայք չենք ստացել, մենք ինչխ կարանք դպրոցը պատվաստում կատարել»:
Ալվարդ Ինջյանը տեղեկացրեց, որ ծնողներին երկու օր իրազեկել են «գարդասիլի» պատվաստման մասին, սակայն երեխաներին չեն պատվաստելու։ Ծնողները հրաժարվել են դրանից։