Փոփոխություններ դեռ չգործող օրենսգրքում
2018թ հունվարի 1- ից Հայաստանում ուժի մեջ է մտնելու Հարկային օրենսգիրքը: Տնտեսվարողները դեռ չգործող փաստաթղթից արդեն դժգոհ են: Կառավարությունում քննարկումներ են ընթանում։
Արդյունքում՝ փորձագիտական շրջանում արդեն կարծիքներ են հնչում, որ Հարկային օրենսգրքի ուժի մեջ մտնելը կարող է հետաձգվել: Պաշտոնական հարթությունում, սակայն, դեռ լռություն է:
Բիզնես միջավայրի կայացման կարևոր նախապայմանը հարկային օրենսդրությունն է: Սա միաժամանակ այն օրենսդրությունն է, որը Հայաստանում ամենաշատն է փոփոխությունների ենթարկվում:
Փորձագետների մի մասը պնդում է՝ պարբերաբար փոփոխվող օրենսդրության պատճառով բիզնես միջավայրը դժվար կանխատեսելի է ինչպես տեղական, այնպես էլ օտարերկրյա տնտեսվարողների համար: Եվ ահա մի քանի տարի առաջ որոշվեց մշակել օրենսգիրք, որտեղ կամփոփվի հարկային ողջ օրենսդրությունը։ Նախագիծն ընդունելիս պատասխանատուները վստահեցնում էին՝ հարկային օրենքները պետք է լինեն պարզ ու մեկնաբանելի ինչպես հարկային մարմինների, այնպես էլ հարկատուների համար:
Դեռ ուժի մեջ չմտած՝ օրենսգրքից դժգոհությունները սկսվել են: Ավելին, վարչապետ Կարեն Կարապետյանը լրագրողների հետ հանդիպման ժամանակ խոստովանեց, Հարկային օրենսգիրքն ընդունեցին, սակայն ճարահատյալ:
«Մենք չենք թաքցրել որ կային կետեր, որոնք ընդունել են ճարահատյալ»:
Տնտեսագետ Ատոմ Մարգարյանը նույնպես ընդգծում է՝ օրենսգրքի ընդունումը ԱՄՀ ու ՀԲ-ի ճնշումների արդյունքն էր։ Հիշեցնում է՝ Մերձբալթյան երկրները հրաժարվեցին դոնորների տրամադրած գումարներից, ուստի և առաջարկներից: Անցյալ տարի, երբ 2017թ բյուջեն էր մշակվում ու դեֆիցիտի ֆինանսավորման գումարներն էին սպաասվում, ընդունվեց հարկային օրենսգիրքը: Եվ ահա այսօր արդեն մշակված օրենսդրությունում խնդիրներն ավելի քան ակնհայտ են:
Տնտեսագետ Բագրատ Ասատրյանը հարկային օրենսգրքի անհրաժեշտությունը Հայաստանի՝ ԵԱՏՄ-ին անդամակցությամբ է պայմանավորում։ Պարզաբանում է՝ այնպիսի տնտեսական միջավայրում ենք, որ պետք է գնալ դրան:
2018թ հունվարից արդեն այս օրենսգիրքն ուժի մեջ է մտնելու: «Ռադիոլուրի» զրուցակից Գործատուների հանրապետական միության նախագահ Գագիկ Մակարյանը, սակայն, կարծում է, որ ժամկետները կփոփոխվեն. անելիքները շատ են, դեռ ամբողջությամբ ուժի մեջ չմտած օրենսգիրքն արդեն փոփոխությունների է ենթարկվում: Պաշտոնական շրջանակները դեռ լռում են, սակայն փորձագիտական դաշտում են բարձրաձայնում:
Զրուցակիցս ընդգծում է՝ կարևոր է, որ այն կոռուպցիոն ռիսկեր չառաջացնի: Մտահոգություններով հանդերձ՝ այս օրենսգրքից ակնկալիքները մեծ են: Հստակ է մի բան՝ դեռ ուժի մեջ չմտած փաստաթուղթն արդեն փոփոխությունների է ենթարկվում: Այստեղ հաշվի են առնվում տնտեսվարողների դժգոհությունները: