Բյուջեի ծախսերը կավելացվեն եւս 15 միլիարդով
Կառավարությունն այսօր հաստատել է 2018- ի բյուջեի վերջնական նախագիծը՝ ընդունված առաջարկություններով։ Մի քանի ոլորտներում գործադիրը ավելացրել է ծախսերը:
Տնտեսագետ, «Հանրային քաղաքականության վերլուծությունների ազգային կենտրոն» ՀԿ նախագահ Արտակ Մանուկյանը կարծում է, որ ավելացումը անհրաժեշտ թիրախների վրա չի խարսխված:
Նաև մի հետաքրքրական դիտարկում է առանձնացրել պարտքի սպասարկման բեռի հետ կապված:
Հաջորդ տարվա գլխավոր ֆինանսական փաստաթուղթը աստիճանաբար վերջնական տեսքի է բերվում: Կառավարությունում վերլուծել, քննարկել ու, հաշվի առնելով բյուջեի հնարավորությունները, որոշել են մոտ 15 մլրդ դրամով ավելացնել ծախսերը:
Ֆինանսների նախարար Վարդան Արամյանը կառավարության նիստում մանրամասնեց՝ մոտ 1,5 մլրդ դրամ ավելացրել են՝ փոխարժեքի տատանումներով պայմանավորված: Բացի այդ, կառավարությունը կկատարի բնակչությանը տրված իր խոստումը՝ հաջորդ տարի կսուբսիդավորի խմելու ջրի բարձրացված սակագինը: (Այն բյուջեի վրա 1 մլրդ 289 մլն դրամ կարժենա:) Ֆինանսների նախարար Վարդան Արամյան:
«Մի գրպանից մյուս գրպանը». ջրի սակագնի սուբսիդավորումն այսպես է բնորոշում տնտեսագետ, Հանրային քաղաքականության վերլուծությունների ազգային կենտրոնի նախագահ Արտակ Մանուկյանը: Հերթական անգամ հարց է բարձրացնում ՝ ի՞նչն է կառավարությանը խանգարում, որպեսզի բնակչությանն ազատի բնական մենաշնորհ հանդիսացող սակագների համար վճարվող ԱԱՀ-ից:
Տնտեսագետն ունի «ինչո՞ւ»- ի պատասխանը
4 մլրդ դրամով կավելացնեն առողջապահության ոլորտի ծախսերը: Ֆինանսների նախարարի տեղեկացմամբ, պատգամավորների առաջարկների գերակշիռ մասը հենց այս ոլորտի հատկացումներին էին ուղղված: Ավելացրել են նաև կառավարության աշխատակազմի ծախսերը, պահուստային ֆոնդը: Վերջինը՝ անակնկալ ծրագրերից խուսափելու համար:
Տնտեսագետ Արտակ Մանուկյանը «Ռադիոլուր»ի հետ զրույցում նշում է՝ ընդհանուր առմամբ, լայն հասարակության համար ընտրված թիրախնեը ներառական աճի հնարավորություն չեն տալիս: Մանուկյանն ընդգծում է՝ կապիտալ ծախսերի ավելացումը ինքնանպատակ չպետք է լինի:
Զրուցակիցս հիշեցնում է՝ շինարարության ոլորտում կոռուպցիոն ռիսկերը շատ են: Բյուջեի համար 2019 թ ամենածանրերից է լինելու՝ պարտքի սպասարկման վճարումը առավելագույնն է կազմելու։
Տնտեսագետ զրուցակիցս ընդգծում է՝ եթե անգամ որևէ բան չփոխվեր՝ պարտքի սպասարկման բեռը միևնույնն է ավելանալու էր: Պարզաբանում է՝ նախ լրանում է արտոնյալ պայմաններով վերցված վարկերի ժամկետը, նաև բարձրացել են լիբոր + տոկոսադրույքները: