Վրաստանի մայրաքաղաքում անցկացվում է Մետաքսի ճանապարհին նվիրված մեծ խորհրդաժողով։ Դրան մասնակցում է ավելի քան 60 երկրից շուրջ 2000 պատվիրակ։
Նրանք ներկայացնում են 500 միջազգային ընկերություն։ Վրաստանի փոխվարչապետ, Էկոնոմիկայի նախարար Դմիտրի Քումսիշվիլին «Ռադիոլուրի» հետ զրույցում նշել է, որ Հայաստանը եւս կարող է այդ ծրագրի մասնակից լինել։
Չինաստանը Եվրոպային կապող նոր «Մետաքսի ճանապարը» կարևոր նախագիծ է ոչ միայն Վրաստանի, այլ ողջ տարածաշրջանի համար՝ «Ռադիոլուր»-ի հետ զրույցում վստահեցրեց Վրաստանի Էկոնոմիկայի նախարար Դմիտրի Քումսիշվիլին։ Նրա խոսքով՝ Կովկասն այս երթուղու կարևոր մասն է։
Հայաստանը արդյո՞ք կարող է մասնակցել այս նախագծին, նախարարն ասաց․«Իհարկե, կարող է մասնակցել։ Հայաստանը մասնակցություն ունի բազմաթիվ ճանապարհային միջանցքների, այնպես որ կարող է մասնակցել նաև այս նախագծին»։
Պատմական մետաքսի ճանապարհի վերականգնման գաղափարը պատկանում է Չինաստանին, որը մեծ ներկայացուցչական կազմով է ներկայացել թբիլիսյան համաժողովին։ Չինաստանի Մետաքսի ճանապարհ միջազգային առևտրի պալատի գլխավոր քարտուղար Լի Ժոնգանգը «Ռադիոլուր»-ին ասաց, որ Վրաստանից կմեկնի նախագծի վերաբերյալ աշխարհի մի շարք երկրներից ստացած արժեքավոր խորհուրդներով։
«Տեղյակ եք, որ Մետաքսի ճանապարհի վերականգնման նախաձեռնությունը Չինաստանինն է, որը առաջարկել է աշխարհի բոլոր երկրներին մասնակցել նախագծին։ Մենք կողջունենք բոլոր նրանց, ովքեր կցանկանան մասնակցել»։
«Անակլիա քաղաք» ընկերության ղեկավար Քեթի Բոչորիշվիլին համոզված է, որ Վրաստանի սևծովյան Անակլիայի շրջանի նավահանգիստը դառնալու է Մետաքսի ճանապարհի գլխավոր դարպասը։
«Մենք ուրախ կլինենք նավահանգստի ծրագրում ու ազատ ինդուստրիալ գոտում տեսնել նաև հայաստանյան ընկերություններին»։
Վրաստանի հարցերով փորձագետ Ջոնի Մելիքյանը նշելով, որ Մետաքսի ճանապարհը բաղկացած է լինելու ոչ թե մեկ, այլ բազմաթիվ երթուղիներից, ասում է, որ դրանցից մեկին, անշուշտ, կարող է մասնակցել նաև Հայաստանը
«Միջին Ասիայով, Ադրբեջանով ու Վրաստանով Եվրոպա հասնող երթուղին Մետաքսի ճանապարհի միայն մի մասն է։ Դա միակը չէ, ուստի Հայաստանը կարող է միանալ մեկ այլ հատվածի»։
Սակայն դրա համար, ըստ նրա, Հայաստանը պետք է ակտիվ ներգրավվածություն ունենա նման համաժողովներին, աշխատանքներ տանի նաև Չինաստանի հետ՝ միաժամանակ բարելավելով ենթակառուցվածքները, որոնք կարող են Հայաստանին թույլ տալ դառնալ 21-րդ դարի Մետաքսի ճանապարհի մասնակից երկիր։
