Նոր թղթադրամները կարող են լվանալ ոչ միայն օֆշորում, այլեւ՝ լվացքի մեքենայում
Կենտրոնական բանկի ներկայացրած նոր թղթադրամի էսքիզները բուռն քննարկում է առաջացրել հատկապես համացանցում:
Քննարկման առիթ են դարձել թե՛ դրանց վրա պատկերված հայ նշանավոր գործիչների ընտրությունը, թե՛ արտաքին տեսքը:
Ֆեյսբուքի շատ օգտատերեր այնքան են տպավորվել նոր թղթադրամների գաղափարով, որ նույնիսկ սեփական տարբերակներն են առաջարկում՝ հիմնականում զավեշտալի:
2018 թվականից շրջանառության մեջ դրվելիք նոր տեսքի թղթադրամների նմուշները բավականին բուռն արձագանք գտան հատկապես համացանցում: Ֆեյսբուքի շատ օգտատերեր այնքան են տպավորվել նոր թղթադրամների գաղափարով, որ նույնիսկ սեփական զավեշտալի տարբերակներն են առաջարկում:
Այսպես օրինակ, 500 դրամանոց թղթադրամի վրա պատկերված է տաքսու վարորդ, կենտրոնում էլ գրված՝ մինիմալ:
1000 դրամանոցի վրա պատկերված է պաշտպանության նախարար Վիգեն Սարգսյանը:
5000 դրամանոցի վրա՝ ՃՈ մեքենա:
10.000 դրամանոց թղթադրամի խորհրդանիշը ԿԸՀ նախագահ Տիգրան Մուկուչյանն է:
1 մլն դրամի վրա պատկերված է երգչուհի Շերը:
Հայկական նոր թղթադրամների էսքիզների վրա կարելի է տեսնել նաև Սամվել Մարտիրոսյանին և Քիմ Քարդաշյանին, վերջինս խորհրդանշում է 2 ծիծիլյոնանոց թղթադրամը:
Ֆեյսբուքյան օգտատերերի մի մասն էլ նոր թղթադրամների գաղափարին արձագանքել է կարծիքներով, քոմենթներով և գրառումներով: Հանրային ռադիոյի «Ֆեյսբուքյան Հայաստան» հաղորդման հեղինակ Տիգրան Քոչարյանին օրինակ դուր է գալիս նոր թղթադրամների տեսքը, ինչի մասին հայտնել է նաև ֆեյսբուքում:
«Հա, ես անճաշակ, հետամնաց, գավառամիտ մարդ եմ։
Ինձանով լիներ, փողի վրա մենակ թիվն էր լինելու, մեջի սպիռալը ու կույրերի համար նախատեսված գծիկները»։
Մեդիափորձագետի գրառմանը հաջորդել են ոչ պակաս հետաքրքիր քոմենթները:
«… Սերգեյ Երիցյան- Տիգրան ջան, հարցը ճաշակը չի, հարցը համաշխարհային տրենդները են ու էն որ ազգային արժույթը չպիտի նման լինի “ցիգանի դեյրայի”։ Համենայն դեպս՝ եթե երկիրը Խաղաղ Օվկիանոսի մանդր-մունդառ երկրներից չի, ովքեր իրանց փողը որպես սուվինիր են ծախում տուրիստներին»։
«Սերոբ Անտինյան- Էս աժիոտաժը ու համազգային դիզայներական շարժումը լրիվ անհիմն են: Վառ գույները կմշակվեն, կբերվեն ավելի հանգիստ, ոչ կոնտրաստային տեսքի ու ամեն ինչ կընկնի իր տեղը: Ո՜Վ ՀԱՅ ՃԱՇԱԿԱՎՈՐ ԺՈՂՈՎՈՒՐԴ…»:
Այս բոլոր զավեշտալի քննարկումների և տարբերակների առիթը օրեր առաջ ԿԲ կողմից ներկայացված 2018-ին շրջանառության մեջ ներդրվող երրորդ սերնդի կոմպոզիտային թղթադրամների էսքիզներն էին:
Նոր 1000, 2000, 5000, 10 000, 20 000 և 50 000-անոց թղթադրամների դիզայնի համար հայտարարված մրցույթում հաղթող են ճանաչվել 3 հեղինակների` Էդվարդ Կուրղինյանի, Վարդան Վարդանյանի և Սուրեն Սիմոնյանի աշխատանքները։
Նոր սերնդի թղթադրամների նոր տեսքը որոշել է Կենտրոնական բանկի գեղարվեստական խորհուրդը։ Այն աշխատանքային հանդիպումներ է ունեցել Հայ առաքելական եկեղեցու ներկայացուցիչների, մտավորականների հետ, հաշվի առել բանկի Այցելուների կենտրոն ներկայացրած առաջարկները՝ ասել է ԿԲ գլխավոր քարտուղար Դավիթ Նահապետյանը:
Ի դեպ՝ նոր թղթադրամներն ունենալու են պաշտպանվածության բարձր հատկանիշներ, լինելու են ավելի երկարակյաց ու դիմացկուն, ինչը, ըստ կենտրոնական բանկի, էական կրճատելու է դրամաշրջանառության ծախսերը։ Այնպես որ՝ հայկական նոր փողերը ոչ միայն պաշտոնյաներն ու գործարարները կարող են լվանալ օֆշորում, այլեւ մենք՝ հասարակ մահկանացուներս այդ փողերը կարող ենք լվանալ սեփական լվացքի մեքենաներում։