2018թ հունվարի 1- ից ուժի է մեջ է մտնելու Հարկային նոր օրենսգիրքը: Դեռ ուժի մեջ չմտած փաստաթղթում փոփոխություններ են կատարվում: Այսօր էլ կառավարության նիստում ներկայացված մի քանի նախագծերով փոփոխություններ են կատարվել:
Պատասխանատուները վստահեցնում են՝ դրանք արվել են՝ հաշվի առնելով տնտեսվարողների մտահոգությունները: Փաստաթղթի նախագծում ամրագրված դրույթներից մի քանիսը լույս են սփռել վերջին շրջանում մամուլի այն հրապակումների վրա, որոնց համաձայն, հաջորդ տարվա հունվարից կասեցվելու է եկամտային հարկի վերադարձը:
Այն ոչ միայն գործելու է, այլ նաև սոցիալական վերաիմաստավորում է ստանալու: Ֆինանսների նախարար Վարդան Արամյանը նախ կառավարության նիստում, հետո արդեն լրագրողների հետ զրույցում է անդրադարձել խնդրին՝ նշելով՝ եկամտային հարկը կվերադարձվի, սակայն, եթե գնվող բնակարանի արժեքը չի գերազանցում 55 մլն դրամի շեմը: Սա միակ նախապայմանը չէ:
Շինարարության աշխուժացման նպատակով արդեն մի քանի տարի է, ինչ կառավարությունը փոփոխություններ է կատարել «Եկամտային հարկի մասին» օրենքում: Արդյունքում՝ անմիջապես կառուցապատողից բնակարան ձեռք բերելու դեպքում հիփոթեքային վարկի տոկոսագումարը վճարվում է գնորդի եկամտահարկից։
Գործընթացի մեկնարկից մինչև այժմ ՀՀ պետական բյուջեից վերադարձվել է 3,2 մլրդ դրամի չափով եկամտային հարկի գումար: Շինարարության ոլորտն այս տարիներին, այդպես էլ աճ չգրանցեց: Տնտեսագետ Մեսրոպ Առաքելյանն ընդգծում է շինարարությունը ոչ թե առանձին ներդրում է, այլ՝ ներդրումների հետևանք:
Այս կարծիքը կիսում են նաև կառավարությունում: Հարկային օրենսգրքում այսօր կատարված փոփոխություններով՝ 2018թ հունվարի 1- ից փոխվում է եկամտային հարկի վերադարձի սկզբունքը: Նախկինում գումարը վերադարձվում էր՝ անկախ գնված բնակարանի արժեքից:
Ֆինանսների նախարարությունում վստահեցնում են՝ փոփոխություններ են կատարել ու թիրախավորել ցածր ու միջին խավին: Այսպիսով՝ օրենքով է ամրագրվում՝ եկամտային հարկը կվերադարձվի, եթե գնվող բնակարանի արժեքը չի գերազանցում 55 մլն դրամի շեմը: Ֆինանսների նախարար Վարդան Արամյանի փոխանցմամբ գործելու է ևս մեկ նախապայման:
Նախարարը հստակեցնում է՝ եթե քաղաքացին ունի բնակարանի բարելավման կարիք, նույնպես կարող է օգտվել այս ծրագրից: Օրենսդրությամբ է ամրագրվում՝ 2018 թվականի հունվարի 1-ից հետո վերադարձվող գումարը չի կարող գերազանցել 1.5 միլիոն դրամը:
Վճարված տոկոսների գումարների չափով եկամտային հարկից վերադարձման հնարավորությունից 2018 թվականի հունվարի 1-ից հետո ֆիզիկական անձինք կարող են օգտվել միայն մեկ անգամ: Գումարի շեմը պատահական չի ընտրվել: Մանրամասն ուսումնասիրել են, հաշվարկներ կատարել:
«Միջին և ցածր խավին նորմալ է որ օժանդակենք»:
Ֆինանսների նախարարի խոսքով, նախաձեռնությունը շինարարության ոլորտին որոշակի աշխուժացում բերեց, սակայն կյանքը ցույց է տալիս, որ ոլորտի աշխուժացման նախապայմանը տնտեսության աճն է:
