Սիրիահայ ակնաբույժ Սոսի Տեր-Արթինյանն արդեն 4 ամիս աշխատում է Մեծամորի պոլիկլինիկայում: Անցած տարվա օգոստոսին ընտանիքով եկել էին Հայաստան ծնողներին տեսնելու և պատերազմի պատճառով չեն վերադարձել: Հայրենիքում ավելի ապահով են ու հանգիստ: Այստեղ ամուսինները շարունակում են աշխատել մասնագիտությամբ, որդին արդեն ուսանող է, աղջիկը ավագ դպրոցի սովորող:
Մոտ մեկ տարի առաջ, ամառային արձակուրդներին Սոսին ընտանիքով եկավ Հայաստան՝ ծնողներին ու հարազատներին տեսնելու: Եկան ու մնացին: Պատերազմի պատճառով նրա հարազատները 3 տարի առաջ էին ներգաղթել հայրենիք: Սոսի Տեր- Արթինյանը մնացել ու իր պարտականություններն էր կատարում դեռևս պատերազմի մեջ գտնվող երկրում: Ծնվել, մեծացել ու բարձրագույն կրթությունը ստացել էր Հալեպում, այնտեղ ունի սեփական ակնաբուժական կլինիկա, աշխատում էր նաև Հալեպի հիվանդանոցում:
,,Առավոտ շտապում էինք աշխատանքի, իրիկունը վերադառնում, չէինք հասցնում նկատել, թե ինչպես են օրերն անցնում: ՈՒ էդպես մնացինք: Ծնողքիս ու հարազատներիս կարոտել էի: Անցած օգոստոսին եկանք տեսնելու և չվերադարձանք հրթիռներու պատճառով,,:
Կինն ակնաբույժ, ամուսինն ակնոցավաճառ, նրանք Հայաստանում նույնպես գտել են աշխատանք ու շարունակում են զբաղվել նույն գործով: Դիմելով առողջապահության նախարարություն Սոսին առաջարկ էր ստացել աշխատել մարզային հիվանդանոցում: Մեծամորի հիվանդանոցի գլխավոր բժիշկ Միքայել Վանյանը կարգավորել է հարուստ կենսափորձով ու գիտելիքներով սիրիահայ բժշկուհուն աշխատանքի տեղավորման հարցը: ,,Մեզ համար մեծ պատիվ է սիրիահայ բժշկուհու մեզ մոտ գտնվելը, կարճ ժամանակամիջոցում նրա մասին ակնածանքով են խոսում նաև հիվանդները,,- ասաց գլխավոր բժիշկը:
Ակնաբույժի ընտանիքն ապրում է վարձակալած բնակարանում, որդին այս տարի ընդունվել է ազգային պոլիտեխնիկական համալսարան, աղջիկը սովորում է ավագ դպրոցում: Բժշկուհին սիրում է իր աշխատանքը, Հայաստանը, իսկ Հալեպ վերադառնալու մասին դեռ ոչինչ չի ասում, պատերազմի վտանգը չի անցել . ,, Այնտեղ շատ լավ էր, սովորել էինք, միայն հրթիռներու խնդիրն էր,,:
Մեծամոր բժշկական կենտրոնի գլխավոր բժիշկը որոշակի պլաններ ունի ակնաբույժի գործունեության ընդլայնման վերաբերյալ: Ցանկություն կա Մեծամորի հիվանդանոցում ակնաբուժական վիրահատություններ իրականացնել, սակայն դա դեռ ժամանակ ու միջոցներ է պահանջում:
