Ազգային վիճակագրական ծառայության այս տարվա հինգ ամիսների տվյալներով՝ գյուղատնտեսության ոլորտում 3,5 տոկոս անկում է արձանագրվել: Բուսաբուծությունը նվազել է, անասնապահությունը՝ աճել: Վերջինիս աճ Համաշխարհային բանկի վարկային միջոցներով իրականացվող «Արոտների ջրարբիացման ու անասնապահության զարգացման ծրագրի» հաշվին է: Բուսաբուծության անկումը գյուղնախարարը անցյալ տարվա ցուրտ ձմեռով է պայմանավորել: Գյուղատնտեսության նախարար Իգնատի Առաքելյանն այսօր այս տարվա առաջին կիսամյակում կատարված աշխատանքներն ու նախագծերն է ներկայացրել, խոսել ոլորտում նոր սկսվող ու արդյունք ակնկալող ծրագրերից: Մթերող ու վարկունակ կազմակերպությունները մատչելի պայմաններով վարկեր կստանան, փոխվում է գյուղացիներին տրամադրվող գյուղացիական վարկերի տրամաբանությունը: Օրակարգում նաև գյուղացիական ապահովագրության պիլոտային եռամյա ծրագիրն է: Գյուղատնտեսության ոլորտի հիմնական խնդիրներն ու գյուղատնտեսության նախարարի պարզաբանումները՝ «Ռադիոլուրի»ռեպորտաժում:
Գյուղատնտեսության նախարար Իգնատի Առաքելյանը խնդրից տեղյակ է: Ավելին, «Ռադիոլուրի» խնդրանքով նա որոշ մանրամասներ ներկայացրեց։ Ջրային պետական կոմիտեում զրույցից պարզել են՝ իրականում խնդիրը ոռոգման ջրի բացակայության մեջ չէ, այլ՝ ոռոգման ջրի վարձավճարների ուշացման:
Ոռոգման ջրի հետ կապված խնդիրներ, թեեւ ժամանակավոր, չեն ունենա, Լոռու, Արագածոտնի, Տավուշի, Սյունիքի ու կարկտահարված մյուս համայնքների գյուղացիական տնտեսությունները:
Ոլորտի պատասխանատուի փոխանցմամբ, մինչ կառավարությունը վերջնական որոշման կգա՝ գյուղացիները ոռոգման ջրից չեն զրկվի: «Գյուղվարկերի մասով աշխատանքն սկսված է» ,- ասաց Իգնատի Առաքելյանը:
Այս օրերին ծիրանի մթերման ակտիվ սեզոնն է: Այս տարի փոքր ընկերությունները արտահանման խնդիրների առջև կանգնեցին: Նրանց փոխանցմամբ, Կրասնոդարի շուկայում չեն կարողանում իրացնել ծիրանը:
Գյուղնախարարն այս հարցի պատասխանն էլ ունի: Իգնատի Առաքելյանի պարզաբանմամբ. «Չեմ կարծում, որ Սպայկան խոչընդոտում է: Ոչ ոք չի կարող խոչընդոտել ապրանք իրացնելու հարցում: Այստեղ ավելի շատ գնորդի հարցն է: Գնորդը ցանկանում է աշխատել է ուզում երաշխավորված մատակարարի հետ»:
Մթերման դժվարություններից խուսափելու համար այս տարի կսկսեն վարկավորել մթերող ձեռնարկություններին: Գյուղվարկերի տրամադրման քաղաքականությունն է փոխվում՝ հստակեցրեց Իգնատի Առաքելյանը: 3-10 մլն դրամ ՝ 5 տոկոս տարեկան տոկոսադրույքով վարկ կստանան գյուղատնտեսության զարգացման ծրագրեր ներկայացնող տնտեսությունները: Օրակարգում նաև գյուղացիական ապահովագրության ինստիտուտի ներդրման պիլոտային եռամյա ծրագիրն է:
