Տնտեսական թեժ նախագծերը քննարկվում են թեժ ամռանը: Չնայած խորհրդարանական ամբիոնից հնչող բազմաթիվ քննադատություններին՝ նախորդ շաբաթ խորհրդարանն ընդունեց կառավարության գործունեության առաջիկա հինգ տարիների ծրագիրը: Կառավարության վերջին նիստում էլ հաստատվեց 2018-2020թթ. պետական միջնաժամկետ ծախսերի ծրագիրը։ Պետական միջնաժամկետ ծախսերի ծրագրի հիմնական նպատակը պետական ծախսերի կառավարման համակարգի արդյունավետության բարձրացումն է: Գուցե այս նախագիծն էլ թեժ քննարկվեր, եթե քննարկումները ծավալվեին խորհրդարանում: Նախագիծը, սակայն, ներկայացվեց կառավարության նիստում: Վերջին օրերին հաստատվող փաստաթղթերի հիմնական նպատակը թերևս մեր երկրում տնտեսական ու քաղաքական կյանքը բարելավումն է: Տնտեսական զարգացումները շղթայական ռեակցիայով նաև մեր՝ շարքային քաղաքացիներիս, կյանքի որակը կբարելավի: Սա պատասխանատուները խոստանում են առաջիկա տարիներին:
840 էջ՝ 2018-2020թթ. պետական միջնաժամկետ ծախսերի ծրագրի ծավալն է: Այստեղ պատասխանատուները կետ առ կետ, էջ առ էջ շարադրել են տնտեսության զարգացման հեռանկարները: Այն ուղղակի թե անուղղակի բխում է կառավարության գործունեության ծրագրից: Ֆինանսների նախարար Վարդան Արամյանի տեղեկացմամբ, արտաքին աշխարհից եկող շոկերին դիմագրավելու համար ստիպված արտաքին պարտքն են ավելացրել:
Պարտադրված խախտել են նաև սեփական եկամուտներ և ընթացիկ ծախսեր հարաբերակցությունը։ Ֆինանսների նախարարը խոստանում է՝ 2018-ից եկամուտները ծախսերից ավելին կլինեն։ Սա տնտեսական աճն ակտիվացնելու նպատակով:
Միջազգային փորձը վկայակոչելով՝ Արամյանը նշում է՝ պարտքը վտանգավոր չի լինի, եթե այն ուղղվում է տնտեսության զարգացմանը: Հաշվի առնելով հարկեր- ՀՆԱ հարաբերակցությունը, բարձր ցուցանիշեր են ամրագրվել նաև առաջիկա երեք տարիների համար: Տարեց տարի բարձրանալու են նաև տնտեսական ցուցանիշերը՝
«2017 թվականի համար կանխատեսվում է 3.3%, իսկ 2018-2020 թվականներին՝ համապատասխանաբար 4.7, 5.4 և 5.7% տնտեսական աճ»:
«Ամբիցիոզ ցուցանիշեր»,- վարչապետ Կարեն Կարապետյանն այսպես է բնորոշում ՄԾԾ-ում նախանշված թվերը
«Ծրագրով բավականին ամբիցիոզ սեփական եկամուտների մուտքերի աճ և շատ կոշտ հաստատուն ծախսերի կառավարում ենք նախատեսում: Նախատեսում ենք՝ տնտեսված միջոցներն ուղղել դեպի տնտեսական աճ»:
Գործատուների հանրապետական միության նախագահ Գագիկ Մակարյանից փորձեցինք պարզել՝ ունի։ Արդյոք այս կառավարությունն այդ ամբիցիոզ ցուցանիշերը կյանքի կոչելու հնարավորություն: Կոշտ, սակայն, գործատուներին չվնասող քաղաքականություն ՊԵԿ- ի աշխատանքներում Մակարյանը նկատել է: Եթե այսպես շարունակվի՝ արդյունքն ակնհայտ կլինի:
Որդեգրած քաղաքականությունը Գագիկ Մակարյանը տրամաբանական է համարում՝ ոչ թե առճակատման գնալ, այլ փոփոխություններ անել: Հարկային համակարգը Հայաստանում տնտեսական աճին չէր նպաստում՝ ասում է ԳՀՄ նախագահը։
Առաջիկա տարիներին սոցիալական կյանքը բարելավելու և լավ ապրելու համար բոլոր հիմքերը տեսնում է Գագիկ Մակարյանը: Նրան հույս է ներշնչում այս կառավարությունը: Միայն թե նկատում է՝ կադրային հարցում դեռ կաղում են:
