Ամուլսարի հանքավայրի ծրագիրն իրականացնող Լիդիան Արմենիա ընկերության արագ արձագանքման խմբի անդամներն այսօր ստացել են Արտակարգ իրավիճակների նախարարության սերտիֆիկատներ: Խմբի 11 անդամները 20-օրյա դասընթացներ են անցել Արտակարգ իրավիճակների նախարարությունում՝ հմտանալով հանքի տարածքում արտակարգ իրավիճակները կանխարգելելու եւ կառավարելու մեջ: Ընկերությունում վստահ են, որ այս կերպ իրենք զգալիորեն բարձրացնում են հանքավայրի շահագործման անվտանգությունը: Այդ ամենին զուգահեռ՝ ակտիվիստ-բնապահպանները շարունակում են բարձրաձայնել հանքավայրի շահագործման անդառնալի վնասների մասին: Ամուլսարը շահագործող ընկերության ներկայացուցիչն այսօր կրկին անդրադարձել է դրանց:
Համապատասխան սերտիֆիկատները խմբի անդամներին հանձնեց ԱԻՆ փոխնախարար Էնրիկո Ապրիամովը:
Ձեւավորված արագ արձագանքման հատուկ խմբի անդամներն Ամուլսարի շրջակա համայնքներից են: Լեւոն Հովհաննիսյանը Ջերմուկ համայնքի Գնդեվազ գյուղից է: Արդեն 5 ամիս է աշխատում Լիդիան Արմենիայում որպես անվտանգության բաժնի մոնիթոր: Անցկացված դասընթացները բարձր է գնահատում:
Խմբի ղեկավար Արթուր Հովսեփյանը վստահ է՝ ներդրված ջանքերը բարի պտուղներ են տալու: Խոստանում են՝ արտակարգ իրավիճակներում խումբը լրացուցիչ օժանդակ կառույց կլինի տեղի ԱԻՆ-ի խմբի համար:
Ձեռք բերված կարողություններն ու գիտելիքները մեծապես օգտակար են նաեւ իրենց համայնքների համար՝ վստահեցրեց խմբի անդամներից Գուրգեն Եղիյանը:
Ի դեպ, Ամուլսարի շահագործման հետ կապված բնապահպանները շարունակում են իրենց մտահոգությունները բարձրաձայնել:
Անդրադառնալով բնապահպանների մտահոգություններին՝ Լիդիան Արմենիա ընկերության կայուն զարգացման գծով ավագ ղեկավար Արմեն Ստեփանյանն այսօր կրկին ասաց, որ Ամուլսարի հետ կապված իրենք մասնագետ-բնապահպանների հետ երկար ժամանակ համատեղ աշխատանք են իրականացրել:
Ակտիվիստ-բնապահպաններն էլ ունեն մտահոգություն հայտնելու իրավունք: Ընկերության պարտավորությունն է այդ մտահոգություններին արձագանքել գիտատեխնիկական թվերով ու հիմնավորումներով, ինչը արել են ու պատրաստ են անել միշտ՝ եզրափակեց Ամուլսարը շահագործող ըներության պատասխանատու-ներկայացուցիչ Արմեն Ստեփանյանը:
