ՏՏ-ն Հայաստանում գերակա ճյուղ է հռչակված: Հարկային արտոնություններ՝ սկսնակներին, աջակցություն և արդյունքն ակնհայտ է: Ավելին, ՏՏ ոլորտը կլանում է նաև ապագա ճարտարագետ -ինժեներներին: Նրանք ուսանողական տարիներին աշխատում են ՏՏ ոլորտում ՝ լուծելով իրենց սոցիալական խնդիրները: Հայաստանին ճարտարագետ -ինժեներներ պետք են։ Պատասխանատուներն այժմ մասնավորի հետ համատեղ լուծումներ են փնտրում՝ այս ոլորտը նույնպես զարգացնելու համար: «Լուծման 100 տոկոսանոց բանաձև չկա»,- «Ռադիոլուրի» հետ զրույցում ասում է տրանսպորտի, կապի ու ՏՏ նախարարի տեղակալ Բորիս Դեմիրխանյանը, միաժամանակ կարևորում է միջազգային ու տեղական փորձը, արտոնությունների տրամադրումը: «Ինժեներական մասնագիտությունների նկատմամբ հետաքրքրություն պետք է առաջացնել նաև PR-ի միջոցով»,- համոզված է Դեմիրխանյանը: Փոխնախարարի խոսքով, լրագրողների շրջանում էլ մաթեմատիկական հակվածություն ունեցողները շատ կլինեն, սակայն նրանք ընտրել են լրագրությունը: Մինչ լուծումներ կգտնվեն, առաջիկա շաբաթ օրը Վանաձորում «Ինժեներական մասնագիտացված» համաժողով- ցուցահանդես կանցկացվի:
Առանց բազային կրթության հնարավոր չէ բացը լրացնել՝ ասում է «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը ու խոստովանում՝ ի տարբերություն ՏՏ-ի, այս դեպքում մի քանի ամսում հնարավոր չէ մասնագետ պատրաստել:
ՏՏ-ն ճարտարագետ -ինժեներներին կլանում է՝ քանի որ այստեղ վարձատրությունն է բարձր՝ աշխատանքի ընդունվելիս ուսանողը ստանում է արդեն մոտ 200 հազար դրամ աշխատավարձ: Պետք է քննարկել, թե բուհերում ինչպիսի հնարավորություններ ենք ստեղծում՝ ասում է Բագրատ Ենգիբարյանը:
«15 տարի առաջ 2 հազար աշխատատեղի պահանջարկը երազանք էր ինֆորմացիոն տեխնոլոգիաների համար»,- ասում է Ենգիբարյանն ու նույն մոտեցումը կարևորում նաև ճարտարագիտության համար: Բարձրացված հարցերի շուրջ ոչ մի նախարարություն 100 տոկոսանոց բանաձև չունի՝ խոստովանում է տրանսպորտի, կապի ու ՏՏ նախարարի տեղակալ Բորիս Դեմիրխանյանն ու կարևորում միջազգային ու տեղական փորձը:
Մինչ լուծումները կգտնվեն՝ հունիսի 24-ին Հայաստանում, Վանաձորում, առաջին անգամ «Ինժեներական մասնագիտացված» համաժողով- ցուցահանդես կանցկացվի: Վայրն ու տեղը պատահական չի ընտրվել: Արդեն ինն ամիս Վանաձորում գործում է Տեխնոլոգիական կենտրոնը, որն ունի կոնկրետ ինժեներական ուղղվածություն ունի: «Նեյշնլ Ինստթրումենթս» ընկերության ինժեներ Արամ Սալաթյանը բարձր է գնահատում հայ ճարտարագիտական ներուժը:
«Հայաստանը զարմացնող ճարտարագիտության երկիր է դառնում: Այսօր Հայաստանի ինժեներները կարողանում են հետաքրքիր, զարմացնող լուծումներ առաջարկել՝ ամենաբարդ խնդիրներին, որոնք աշխարհում այսօր ունեն մարտահրավերներ»:
Հավելենք նաև, որ Երևանի մերձակայքում ՝ Բագրևանում, նախատեսված է «Ինժեներական քաղաք» կառուցել: Այն 3 հա տարածք կզբաղեցնի: Հիմնական ներդրողները մոտ 16 մասնավոր կազմակերպություններն են լինելու: Հայաստանի կառավարությունը ՀԲ աջակցությամբ ընդհանուր ենթակառուցվածքները կպատրաստի: Լաբորատորիաները պետություն-մասնավոր հատված սկզբունքով կաշխատեն: Ընդհանուր առմամբ, մոտ 20 մլն դոլարի կպահանջվի:
Ի դեպ, հայկական ինժեներական լուծումների մոտ 60 տոկոսը արտահանվում է: Բագրատ Ենգիբարյանի խոսքով, խոսքը ոչ թե պարզ լուծումների, այլ բարդ ուղղությունների մասին է: Աշխատում են դրսի շուկայի համար:
