,,Հայաստանի Մանուկներ,, հիմնադրամը Արմավիրի մարզի մի շարք դպրոցներում փոխեց երեխաների ապրելաձևը: Մարզի մի շարք դպրոցներ վերակառուցվել են ու ժամանակակից կահավորվել, բարձրացել է ուսման առաջադիմությունը: Դպրոցնեում հիմնադրամը կազմակերպում է առողջապահական ու կրթական մի շարք ծրագրեր, որոնց թվում կարևորում է առողջ ապրելակերպը: Այս խմբակի երեխաները վերջերս գործնականում ցուցադրել են իրենց հմտությունները։
Հիմնադրամը մտահոգված է երեխաների բազմակողմանի կրթությամբ ու զարգացվածությամբ: Քարակերտի թիվ 1 դպրոցի տնօրեն Թամարա Բաղդասարյանը պատմում է 50-ամյա նախկինում անշուք ու անհյուընկալ պատերով կիսավեր դպրոցի նոր կյանքի պատմությունը: ,,Դպրոցը շատ հին էր, ջեռուցվում էր դիզելային վառելանյութով, չուներ զուգարան, ջուր, և էսպես աշխատում էին,, ,- ասում է դպրոցի տնօրեն Թամարա Բաղդասարյանը:
Հետո ամեն ինչ փոխվեց, 2012 թվականից ուսուցումը կազմակերպվում է նոր, ժամանակակից կահավորմամբ տարբեր ծրագրեր իրականացնող դպրոցում, որտեղ գործում է 8 խմբակ, բոլորն էլ՝ անվճար:
,,Հայաստանի Մանուկներ,, հիմնադրամը կրթական ու առողջապահական ծրագրերն իրականացնում է մարզի 18 համայնքի դպրոցներում: Երեխաների առաջադիմությունը բարձրացել է, հայոց լեզվին ու գրականությանը զուգընթաց լավ տիրապետում են օտար լեզվին: Անգլերենի ուսուցման շնորհիվ Լեռնագոգ գյուղի դպրոցի աշակերտուհի Նարեն ԱՄՆ պետքարտուղարության կողմից հովանավորվող ,,Ապագա առաջնորդների փոխանակման՝ FLEX,, ծրագրով հաջորդ ուսումնական տարում սովորելու է Ամերիկայի Միացյալ նախանգներում:
,,Ես ծրագրի հաղթող եմ և ամռանը մեկնելու եմ Ամերիկա, ուրախ եմ, որ այնտեղ եմ սովորելու, ունենալու եմ հետաքրքիր, արկածներով լի օրեր,,-ասում է Նարեն:
Գյուղական դպրոցներում շեշտը դրվում է նաև առողջ ապրելակերպի վրա: COAF-ի Առողջապահական ենթածրագրի ղեկավար Լուսինե Սահակյանը կարևորում է հատկապես առաջին օգնության կազմակերպումը՝ տեսականորեն և գործնականում. ,,Մեկ կիսամյակ նվիրվում է միայն առաջին օգնության կազմակերպմանը, հետո խմբակի բոլոր դպրոցների երեխաները մրցում են միմյանց միջև: Այստեղ կարևորն այն է, որ ոչ բոլոր դպրոցներն ունեն բուժքույր, իսկ երեխաների ստացած գիտելիքները կբավարարեն թե դպրոցում, թե համայնքում կազմակերպելու ճիշտ և գրագետ օգնություն: Բացի այդ ինֆորմացիան երեխաների միջոցով է ներմուծվում համայնք,, :
Դպրոցների առողջ ապրելակերպի խմբակների աշակերտները տարեվերջում մրցույթի են մասնակցում և գործնականում ցուցադրում գիտելիքները: Գյուղերում ապրողներն ապահովագրված չեն օձի խայթոցից, ջրանցքներում ջրահեղձվելուց, խաղալիս՝ կոտրվելուց: Խմբակի երեխաներն առաջին օգնության հմտություններն արդեն ունեն:
,,Օձի խայթոցի դեպքում, եթե ձեռքն է խայթել, ապա հնարավորինս այն պետք է սրտի մակարդակից ավելի ներքև պահել, վիրակապել ամբողջ ձեռքը՝ չայտուցվելու համար, շատ հեղուկներ տալ՝ թույնը նոսրացնելու համար, հիվանդին անշարժ պահել: Չի կարելի վերքը այրել, կտրվածքներ անել, լարան դնել կամ թույնը արտածծելով հեռացնել,,- երեխաների բացատրությունն է մարզում հաճախակի հանդիպող երևույթի՝ օձի խայթոցի առաջին օգնության կազմակերպմանը:
Առողջ ապրելակերպի երկամյա խմբակի սաներին մրցույթի վերջում տրվեցին վկայականներ:
