ԿարևորՀասարակություն

Գլխավոր շտաբի պետը բացահայտում է ԶՈւ կադրային փոփոխությունների պատճառները

Ինչո՞ւ Արցախի պաշտպանության բանակը որոշեց  սահմանային իրավիճակի վերաբերյալ հաղորդագրությունները տարածել ոչ թե նախկինի պես՝ ամեն օր, այլ ամփոփ՝ շաբաթը մեկ անգամ, այսօր լրագրողների հարցին  ՀՀ ԶՈւ շտաբի պետ Մովսես Հակոբյանը պատասխանեց. «ՊՆ ունեցած տեղեկատվությունը՝ որքա՞ն կրակեցին, ո՞ր ուղղությունից եւ ինչպե՞ս, պարունակում է որոշակի գաղտնիություն»:

Մովսես Հակոբյանի խոսքով՝ ՊԲ նշյալ որոշումը չի ենթադրում, թե զինծառայողների վիրավորվելու կամ առողջական խնդիրների մասին տեղեկատվությունը հասարակությանը հասու չի լինելու: Այդ տեղեկությունը հաղորդվելու է, բայց չի նշվելու՝ որ ուղղությամբ եւ որ զորամասում՝ ասաց Հակոբյանը:

Նրանից մեկնաբանություններ ենք խնդրում նաև մամուլի հրապարակումների վերաբերյալ. մասնավորապես՝ ինչու  ՀՀ ԶՈՒ ԳՇ հրթիռային զորքերի և հրետանու վարչության պետ Ալբերտ Մարդոյանը պաշտոնից  ազատվեց, այն դեպքում, երբ ապրիլյան պատերազմի ժամանակ անընդհատ խոսվում էր, որ մեր հրետանին ամենալավն է աշխատել:

Գլխավոր շտաբի պետը վերջ է դնում բոլոր խոսակցություններին՝ Ալբերտ Մարդոյանը զորացրվել է իր դիմումի համաձայն՝ տարիքի հետ կապված ու հաստատում ևս մեկ անգամ, որ ապրիլյան օրերին մեր հրետանին, իսկապես, շատ լավ աշխատել և դրանում անձամբ իր մասնակցությունն է ունեցել նաև Ալբերտ Մարդոյանը:

Իսկ ահա պաշտպանության բանակի հյուսիս-արևելյան ուղղությամբ տեղակայված զորամասի երեք պաշտոնյաներն  ազատվել են  իրենց զբաղեցրած պաշտոնից երեք ժամկետային զինծառայողների ջրահեղձման պատճառով: Աշխատանքից ազատվել են զորամասի հրամանատարը և նրա երկու տեղակալներ, իսկ  մի շարք պաշտոնատար անձիք էլ ենթարկվել են կարգապահական տույժի:

Մայիսի 8-ի առավոտյան ահազանգ է ստացվել, որ ժամկետային երեք զինծառայողներ, չեն մասնակցել առավոտյան տողանին: Բացակայում է նաև պարետային դասակին պատկանող «ՈՒԱԶ»- մակնիշի ավտոմեքենան: Որոնողական աշխատանքների արդյունքում՝ հարակից ջրամբարում հայտնաբերվել են ջրահեղձ եղած զինվորների մարմինները։

Ցուցադրել ավելի
Back to top button