Հայաստանում աշխատող փոքր ու միջին բիզնեսի ներկայացուցիչների 80 տոկոսը առևտրով է զբաղվում: Փորձագետները սա մտահոգիչ են համարում, նկատում են՝ Հայաստանում պետք է արտադրող բիզնեսը զարգանա: Կառավարությունը փորձում է, անում հնարավոր ամեն ինչ, սակայն ՓՄՁ ներկայացուցիչները դժգոհ են: Նրանց հիմնականում անհանգստացնում է շրջանառու միջոցների բացակայությունը: Հայաստանում արդեն յոթ տարի է, ինչ գործում է ՓՄՁ ներդրումներ ՈՒՎԿ-ն, որը մատչելի պայմաններով վարկեր է տրամադրում սկսնակ ու միջին բիզնեսին: Կազմակերպության գործունեության ընթացքում 850 նոր աշխատատեղ է բացվել: ՓՄՁ ներդրումներ ՈՒՎԿ ՁԲԸ գործադիր տնօրեն Արթուր Բադալյանն այսօր ամփոփել է իրենց աշխատանքները:
Հարկային վարչարարություն, խնդիրներ սահմանի վրա, ֆինանսական ռեսուրսների անհասանելիություն. սրանք փոքր ու միջին բիզնեսով զբաղվողների գործունեության առաջին երեք՝ սակայն հիմնական խոչընդոտներն են: ՎԶԵԲ-ի կողմից ֆինանսավորվող Գործարարության աջակցության գրասենյակը ժամանակ առ ժամանակ ուսումնասիրություններ է կատարում՝ փորձելով հասկանալ ոլորտի խնդիրները: 2016-ի արդյունքները չեն ամփոփվել, սակայն, 2015-ի տվյալների համաձայն՝ Հայաստանում գործունեություն իրականացնող տնտեսվարողների 60 տոկոսը գերփոքր ձեռնարկություններն են:
Վերլուծությունները ցույց են տվել, որ մարզերում ՓՄՁ-ներն ավելի քիչ են տեղակայված: Նրանք իրենց հիմնական գործունեությունը իրականացնում են Երևանում: Նույն այս տվյալներով, և ոչ միայն, Հայաստանում ՓՄՁ-ների մեծ մասը զբաղվում է առևտրով:
Խնդիրների շարքում տարիներ շարունակ առաջին հորիզոնականներում նաև շրջանառու միջոցների անմատչելիությունն է։ Արդյունքում՝ ՓՄՁ-ների մեծ մասը քայլերն ուղղում է դեպի մոտակա բանկ, իսկ տրամադրվող վարկերի տոկոսադրույքները, մեղմ ասած, հիասթափեցնող են: 2009թ Հայաստանի կառավարության որոշմամբ ստեղծվեց ՓՄՁ ներդրումներ ՈՒՎԿ- ն: Հենց այս կազմակերպության միջոցով է կառավարությունը ֆինանսական միջոցները հասանելի դարձնում տնտեսվարողներին: Մատչելի պայմաններով վարկեր են տրամադրում արտահանման ուղղություն ունեցող ՓՄՁ-ներին, առևտրի ոլորտն այստեղ չեն վարկավորում:
Թեթև արդյունաբերության ոլորտը Հայաստանում գերակա է ճանաչված։ Ավելին՝ 2011թ ընդգրկված է արտահանմանն ուղղված արդյունաբերության ռազմավարությունում: Ոլորտում խնդիրները շատ են՝ ասում է ՀՀ թեթև արդյունաբերության գործատուների միության նախագահ Հովսեփ Պողոսյանն ու թվարկում ամենակարևորները՝ անհավասար պայմաններ ներկրողների հետ, շուկայում տեղ գտնելու խնդիրներ, բարձր տոկոսադրույքներով վարկեր։
«Մենք այսօր 3- 4 տոկոսի մեջ կկարողանանք շունչ քաշել և ավելի բարձր արտադրողականություն ապահովել»։
ՓՄՁ ներդրումներ ՈԻՎԿ վարկային միջոցները տրամադրում է միջինը 12 տոկոս տոկոսադրույքով:
Նշենք, որ կազմակերպությունը նաև մարզային զարգացման ու վերջերս մեկնարկած գյուղտեխնիկայի տրամադրման լիզինգի ծրագրերն է ֆինանսավորում:
