Քաղավիացիայի ոլորտում վերջին կես տարվա ընթացքում կատարած աշխատանքներն է այսօր ներկայացրել Քաղաքացիական ավիացիայի գլխավոր վարչության պետ Սերգեյ Ավետիսյանը: Նա վերջին շրջանի ուղևորահոսքը պատմական պիկ է բնորոշել, խոսել բաց երկնքի քաղաքականության արդյունքում հայկական ավիացիոն շուկայի հաջողությունների մասին: Տեղեկացրել է՝ մայիսից մեկնարկելու են չվերթները դեպի Թել Ավիվ։ Իսկ Քաղավիացիայի գլխավոր վարչության նախկին պետ Շահեն Պետրոսյանը «Ռադիոլուր»- ի հետ զրույցում շարունակել է պնդել՝ «կառավարության որդեգրած բաց երկնքի քաղաքականության արդյունքում մեր աշխատատեղերը հանձնվեցին օտարներին»:
Օրերս կառավարությանն առընթեր Քաղաքացիական ավիացիայի գլխավոր վարչության պետ Սերգեյ Ավետիսյանը հայտարարեց, որ թուրքական «Պեգասուս» ավիաընկերությունը կհայտնվի հայկական շուկայում: Ավելին, հստակեցված էր նաև առաջին չվերթի օրը՝ հունիսի 1-ից շաբաթը 3 անգամ՝ Ստամբուլից «Զվարթնոց» միջազգային օդանավակայան:
Արդյո՞ք թուրքական ավիաընկերության՝ հայկական ավիացիոն դաշտում աշխատելն իրենից վտանգներ չի ներկայացնում՝ հարցնում եմ Քաղավիացիայի պետ Սերգեյ Ավետիսյանին. « երեկ ստացանք ավիաընկերությունից և այս պահին անորոշ ժամանակով նրանց մուտքը»:
Հայկական երկինքը թուրքական ավիաընկերությունների համար բացվեց 1995թ՝ «Ռադիոլուրի» հետ զրույցում հիշում է վարչության նախկին պետ Շահեն Պետրոսյանը: Նա հանգիստ է՝ եթե անգամ թուրքական ավիաընկերությունը մուտք գործի հայկական շուկա, ապա դա որևէ վտանգ չի պարունակում։ Այլ հարց է Քաղավիացիայի գլխավոր վարչության նախկին պետին անհանգստացնում
« Ես դեմ եմ ոչ թե նրան, որ օտար ընկերություններ են գալիս Հայաստան, այլ, որ կառավարության բաց երկնքի քաղաքականությամբ մեր աշխատատեղերը հանձնվեց օտարներին»:
«Պեգասուս» -ը բյուջետային ընկերություն է, հայերին Եվրոպա գնալիս Ստամբուլի օդանավակայանով թռչելն ավելի մատչելի կլինի՝ ասում է Շահեն Պետրոսյանը: Քաղաքացիական ավիացիայի գլխավոր վարչության պետ Սերգեյ Ավետիսյանը ՀՀ և ԵՄ ընդհանուր ավիացիոն գոտու համաձայնագրի շուրջ պաշտոնական բանակցությունների մեկնարկը դրական է գնահատում: Բանակցությունների երկրորդ փուլը տեղի է ունենալու Բրյուսելում՝ տեղեկացրեց.
« Ըստ էության ազատականացնում ենք դաշտը ԵՄ անդամ բոլոր պետությունների հետ, մեր օրենսդրության մեջ մտցնում ենք այն իրավական կարգավորումները, որոնք իրավական հիմք և բազա կստեղծեն ավիաընկերությունների համար այստեղ ավելի ապահով և կանխատեսելի զգալու համար»։
ԵՄ անդամ երկրները կնախընտրեն «Զվարթնո՞ց» միջազգային օդանավակայանը, թե՞ Գյումրիի «Շիրակ» օդանավակայանը դժվար է ասել, սակայն չի բացառվում, որ առաջիկայում իրանական ավիաընկերությունները թռիչքներ կատարեն դեպի «Շիրակ»:
Քաղավիացիայի նախկին պետն ավելի հավանական է համարում, որ Շիրակից թռիչքներ կկատարվեն ոչ թե դեպի Իրան, այլ՝ Ռուսաստան:
Ի դեպ, այս տարվա ընթացիկ արդյունքներից քաղավիացիայի գլխավոր վարչության պետը գոհ է: Դրական ազդեցություն է թողել հատկապես կառավարության՝ փետրվարի վերջերին ընդունված որոշումը, որով ՌԴ քաղաքացիները Հայաստան են այցելում ներքին անձնագրերով: Մինչ օրս, 7 հազար քաղաքացի է ՀՀ այցելել: Ընդհանրապես, Սերգեյ Ավետիսյանը ուղևորահոսքի աճը պատմական պիկ է բնորոշում:
