ԿարևորՔաղաքական

Մերժում՝ վարչականում, սպասվող քննություն՝ ՍԴ-ում


Խորհրդարանական ընտրությունների ավարտված գործընթացը  դեռևս շարունակվում է  բողոքարկման փուլում:  Կոնգրես-ՀԺԿ դաշինքը ընտրությունների արդյունքները վիճարկում է Սահմանադրական,  իսկ ՕՐՕ-ն՝ վարչական դատարանում, մի քանի տասնյակ  բողոքներ էլ Կենտրոնական ընտրական հանձնաժողովը ստացել է  «Քաղաքացիական դիտորդ» նախաձեռնությունից և դեռ որոշումներ պետք է կայացնի: Ով ինչ է վիճարկում, ինչ հիմքերով և ինչ պահանջներով:

 

Կոնգրես-ՀԺԿ դաշինքը Սահմանադրական դատարանում կկենտրոնանա հատկապես երեք հարցի վրա՝ վարչական ռեսուրսի չարաշահում, ընտրակաշառք և վերահսկովող քվեարկություն: Այս գործոններն, ըստ դաշինքի ներկայացուցիչների, ազդել են քվեարկության արդյունքների վրա: Հետևաբար վիճարկում են  ընտրությունների օրինականությունը և պահանջում են չեղյալ ճանաչել դրանք:

ՀԱԿ խմբակցության ղեկավար Լևոն Զուրաբյանն ասում է՝ կարևորը այնքայն ՍԴ-ի որոշումն է, որքան այդ փաստերը բաձրաձայնելը:

Մեկ այլ ուղղությամբ էլ բողոքարկումը շարունակում էր ՕՐՕ դաշինքը: Այս ուժը կասկածի տակ էր դնում ընտրողների մասնակցության  պաշտանական թիվը և կասկածները փարատելու համար դիմել էր ԿԸՀ՝ մատնահետքերի համադրում կատարելու և հնարավոր համընկնումները պարզելու պահանջով։

ԿԸՀ-ն մերժել էր դիմումը՝ պատճառաբանությամբ, որ այդ գործընթացը բարդ և երկարատև է:  ԿԸՀ-ի մերժումը ՕՐՕ-ն որոշել էր վիճարկել վարչական դատարանում:

Վարչական դատարանն այսօր ավարտեց հայցի քննությունը և մերժեց ՕՐՕ-ի պահանջը: Որոշման հրապարակումից հետո լրագրողների հետ զրույցում դաշինքի ներկայացուցիչ Հրայր Ավանեսյանն ասաց՝ կասկածները փարատված չեն:

«Դեռ չեմ կարծում, որ պայքարը դրանով կավարտվի, սա մեկ դաշինքի խնդիր չէ, սա ազգի խնդիր է»:

Կենտրոնական ընտրական հանձնաժողով մոտ 50 դիմում էլ ներկայացրել է «Քաղաքացի դիտորդ» նախաձեռնությունը: Այն , հիշեցնեմ, տեղական ամենամեծ դիտորդական առաքելություններից էր, որը ներկայացաուցիչներ ուներ տեղամասերի մեծ մասում:  Հայտնաբերված մոտ 1000 խախտումների հիման վրա նախաձեռնության սկսել է բողոքարկման գործընթաց։

325 բողոք են ներկայացրել  տարածքային ընտրական հանձնաժողովներ, հետո  դրանց կայացրած որոշումները  բողոքարկել են  Կենտրոնական ընտրական հանձնաժողով։  Որոշումներին  դեռ սպասոսւմ են:

Գլխավոր խնդիրն,  ըստ նախաձեռնության, եղել է վերահսկելի, ուղղորդված  քվեարակությունը: Այս գնահատականը եղել է նաև  միջազգային դիտորդների, մասնավորապես ԵԱՀԿ/ԺՄԻԳ-ի նախնական զեկույցում, բայց միևնույն ժամանակ ընդգծվել է, որ այդ խախտումները էական ազդեցություն ընտրությունների ելքի վրա չեն ունեցել:  «Քաղաքացի դիտորդ» նախաձեռնության անդամ Լուսինե Հակոբյանի գնահատմամբ, այն մեթոդաբանությունը, որով միջազգային դիտորդները հետևում են գործընթացին, թույլ չի տալիս ամբողջությամբ տեսնել իրական պատկերը:

Իշխող կուսկացությունը տարբեր ուղղություններով ընթացող բողոքարկումներին հանգիստ է վերաբերվում   և առաջարկում է սպասել այն փաստարկներին, որոնք կներկայացվեն:  ՀՀԿ ներկայացուցիչ Հովհաննես Սահակյանը, սակայն,  համոզված է, որ ընտրությունների որակի,  խախատումների քանակի լավագույն ապացույցը հետընտրական գործընթացների բացակայությունն է:

Ցուցադրել ավելի
Back to top button