Հասարակություն

Դաունի համախտանիշով հիվանդներն ու հայկական հասարակությունը (լուսանկարներ)


«Ռադիոլուր»-ը շարունակում է Սոցիալական Հայաստան իր շարքը։ Այսօր կանդրադառնանք անապահով մի ընտանիքի, որտեղ մեծանում է հիվանդ երեխա։ Տասնամյա տղան տառապում է հիվանդությամբ, որը դժվարացնում է նրա շփումը հասարակության հետ։ Հայաստանում հաշմանդամությունն արդեն մարդու համար հասարակությանն ինտեգրվելու մեծ մարտահրավեր է, իսկ անապահով ընտանիքում՝ դա բերում է հուսալքության։

 

 

Քանդած ճանապարհն ու մայթեզրի աղբակույտը տանում էին մեկ հասցե՝ Րաֆֆու 111: Փողոցում մեզ ուղեկցում էին բացառապես թափառական շները: Վերջապես երևաց բարձրահարկ շենքը, որը դժվար չէր գտնել ամայի՝ ասես մարդկության կողմից մոռացված թաղամասում: Մինչ հանրակացարանի բակում հավաքվածները փորձում էին գուշակել, թե ում մոտ ենք գնում, շենքի մուտքի մոտ մեզ դիմավորեցին Նաիրան և իր տասնամյա տղան՝ Արմանը:

Նաիրան այս հանրակացարանում է բնակվում 2002 թվականից, մոր հետ միասին էին ապրում այստեղ մինչև տղայի լույս աշխարհ գալը: Արմանի ծնունդը սակայն ոչ թե նոր լույս պարգևեց անապահով ընտանիքին, այլ՝ մեծ հոգս: Տղան բնածին արատով էր ծնվել, բժիշկները միանգամից ախտորոշեցին դաունի համախտանիշ: Անբուժելի հիվանդության դեմ, ի դեպ, մեկ անգամ չէ, որ փորձել են պայքարել: Ապարդյուն:

Ձայնագրության ողջ ընթացքում Արմանն ուշադիր հետևում էր մեր զրույցին ու ժամանակ առ ժամանակ ինքն էլ էր ուզում մասնակցել դրան: Հարցիս, թե քանի տարեկան ես, Արմանը հպարտությամբ պատասխանեց՝ 8: Այնինչ արդեն 10 տարեկան է:

Նաիրայի հետ Բժշկական գենետիկայի և առողջության առաջնային պահպանման կենտրոնում համաձայն չեն: Ավելին, այստեղ անգամ թյուր են համարում այն տարածված կարծիքը, թե դաունի համախտանիշը դատավճիռ է և նման երեխաները մերժված են հասարակության կողմից:

Բժիշկ-գենետիկ, մանկաբույժ Գոհար Շահսուվարյանը «Ռադիոլուրի» հետ զրույցում նկատեց, որ ինչպես ամբողջ աշխարհում, այնպես էլ Հայաստանում կան կենտրոններ, որտեղ զբաղվում են նման երեխաների զարգացմամբ և օգնում են նրանց ինտեգրվել հասարակությանը:

Կարևորը չհանձնվելն է: Չի հանձնվում նաև Արմանը: Ավելին՝ անգամ որոշել է, թե ինչ է դառնալու, երբ մեծանա:

Դաունի համախտանիշով երեխաներ, ի դեպ, վերջին տարիներին շատ քիչ են ծնվում, մեզ հետ զրույցում նշեց Գոհար Շահսուվարյանը: Պատճառը նախածննդյան շրջանում հիվանդության վաղ ախտորոշումն է:

Մարտի 21-ը Դաունի համախտանիշի համաշխարհային օրն է։ Այս օրը Դաունի համախտանիշ ունեցող մարդիկ, իրենց ընտանիքի անդամները, գործընկերները կազմակերպում և մասնակցում են հանրային տարբեր ակցիաների և միջոցառումների՝ Դաունի համախտանիշի վերաբերյալ իրազեկվածության բարձրացման համար։ Հանրային միջոցառումները նաև նվիրված են իրավունքների իրացման, ներառականության և կարծրատիպերը կոտրելուն։

Ցուցադրել ավելի
Back to top button