Տնտեսական

Տնտեսական հարցեր ու ներդրումային ծրագրեր՝ Կառավարության օրակարգում


Կառավարությունում այսօր  քննարկման առանցքում տնտեսական հարցերն էին, ներդրումային  ծրագրերն  ու վարչապետի հանձնարականները: Ազգային վիճակագրական ծառայության օրերս հրապարակած ցուցանիշերը ոգևորել են կառավարության անդամներին։ Նրանք տնտեսական այս տարվանից մեծ ակնկալիքներ ունեն:


Կառավարությունում շարունակում են պնդել՝ ապահովելու են խոստացված 3,2 տոկոս տնտեսական աճը:  Այս անգամ պնդումների հիմքում  ԱՎԾ-ի հունվարի  տվյալներն են, որոնց համաձայն՝  ՏԱՑ-ը կազմել է  6,5 տոկոս:

Հատկապես արտահանման մասով  ԱՎԾ հրապարակած  նախնական ցուցանիշերը  ոգևորել են տնտեսական զարգացման և ներդրումների նախարար Սուրեն Կարայանին: Նշենք, որ  նախորդ տարվա հունվարի նկատմամբ 35 տոկոս արտահանման աճ է արձանագրվել:

«Ոգևորիչ է ու ուրախալի նաև, որ կա արդյունաբերության 12 տոկոս աճ։ Այն նախադրյալները, որ ստեղծում էինք, հիմա արդեն այդ ցուցանիշերը թվերով արտահայտվում են»:

Նախարարի խոսքով,  ցուցանիշերը  ՀՆԱ-ի աճի վրա դրական ազդեցություն կունենան։ Տարեվերջին արդյունաբերությունում 6 տոկոս  աճ է ակնկալվում: Տնտեսական աճի մասին Կարայանը  կանխատեսումներ անելը վաղ է համարում: Միաժամանակ նշում է, որ խոստացված 3,2 տոկոս տնտեսական աճը կապահովվի: Ֆինանսների նախարար Վարդան Արամյանի ակնկալիքներն ավելին են:

Մատնանշածը՝  այսօր հաստատված ութ ներդրումային ծրագրերն են: Կառավարությունը երեք  ընկերության որոշեց  մաքսատուրքերի  արտոնություն տրամադրել,  չորսին՝  երեք տարով   սահմանին  ԱԱՀ վճարման հետաձգման հնարավորություն ընձեռել,  մեկ ընկերություն էլ «Ալյանս» տնտեսական գոտում շահագործողի իրավունք ստացավ:

Տնտեսագետ Բագրատ Ասատրյանը «Ռադիոլուր»-ի հետ զրույցում անդրադառնալով ներկայացվող  ներդրումային ծրագրերին՝  նշում է՝ «դրանք  լավ գործարքներ են, որոնք կարող են լինել ինչպես լավ,  այնպես էլ վատ»:

Զրուցակիցս շարունակում է պնդել՝ «արդյունքի հասնելու համար համակարգային փոփոխություններ են անհրաժեշտ»:

Ցուցադրել ավելի
Back to top button