Հասարակություն

ՀՀ ՄԻ պաշտպանը լուրջ մտահոգություն է հայտնել լրագրող Ա. Լապշինին Բաքվին արտահանձնելու առթիվ

ՀՀ մարդու իրավունքների պաշտպան Արման Թաթոյանը փետրվարի 7-ին Բրյուսելում հանդիպել է Եվրոպական Միության (ԵՄ) մի շարք բարձրաստիճան պաշտոնյաների, որոնց թվում էին նաև Եվրոպական խորհրդարանի պատգամավոր Ֆրանկ Էնգելը, ԵՄ Հարևանության և ընդլայնման հարցերով գլխավոր տնօրինության Հայաստանի, Ադրբեջանի, Բելառուսի և Արևելյան գործընկերության հարցերով բաժնի ղեկավար Վասիլիս Մարագոսը, ինչպես նաև Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Հերբերտ Զալբերը, հայտնում են ՀՀ մարդու իրավունքների պաշտպանի աշխատակազմից։

Հանդիպումների ընթացքում քննարկվել են Հայաստանում մարդու իրավունքների վիճակին առնչվող, այդ թվում՝ միջազգային հարցեր, ինչպես նաև «Մարդու իրավունքների պաշտպանի մասին» ՀՀ սահմանադրական նոր օրենքի կարգավորումները: ԵՄ պաշտոնյաները կարևորել են նոր օրենքը՝ համարելով այն առաջադիմական և անհրաժեշտ մարդու իրավունքների եվրոպական չափանիշներն երկրում ներդնելու և ամրապնդելու համար:

ԵՄ պաշտոնյաները կարևորել են Արման Թաթոյանի դերը մարդու իրավունքների պաշտպանության ոլորտում՝ ընդգծելով նրա ակտիվությունը և պատրաստակամություն են հայտնել զարգացնել Պաշտպանի և ԵՄ հաստատությունների միջև համագործակցությունը՝ ընդլայնելով ու դարձնելով այն շարունակական:

Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցչի հետ հանդիպման ընթացքում, Արման Թաթոյանը բարձրացրել է Արցախի մարդու իրավունքների պաշտպանի՝ եվրոպական գործընթացներին մասնակից դարձնելու հարցը, հատուկ նշել է լուրջ մտահոգությունը լրագրող Ա. Լապշինի Ադրբեջանին հանձնելու որոշման և դրա անթույլատրելի բացասական նշանակության մասին և ընգծել, որ հիմա էլ ավելի պետք է ակտիվանան այցերը Արցախ:

Պաշտպանը նրան է ներկայացրել 2016 թվականի 29-ի, ինչպես նաև 2017 թվականի հունվարի 3-ի, 8-ի Չինարի գյուղի մոտակայքում Ադրբեջանի զինված ուժերի հարձակումների մանրամասները, պաշտպանի աշխատակազմի կողմից իրականացված փաստահավաք աշխատանքների արդյունքները, ինչպես նաև կազմված զեկույցը, այդ թվում՝ ձեռքբերված ապացույցներով:

 

Ցուցադրել ավելի
Back to top button