Դիրքեր փորող զինվորների պեղած հերթական հնագիտական գտածոն
Լուսինե Ավանեսյան
«Ռադիոլուր»-Ստեփանակերտ
Միջազգայնորեն չճանաչված երկրների ժողովուրդները մշակութային իրավունքների պաշտպանության հարցը պետք է օրակարգում լինի,- կարծում է Արցախի Տիգրանակերտի արշավախմբի ղեկավար Համլետ Պետրոսյանը: Ստեփանակերտում գումարվել է միջգերատեսչական հնագիտական հանձնաժողովի հերթական նիստը:
Ապրիլի 18-ին Արցախում նշվում է հուշարձանների պահպանության օրը: Վերջին տարիներին ձեւավորված ավանդույթի համաձայն հենց այդ օրն է իր նիստը գումարում միջգերատեսչական հնագիտական հանձնաժողովը: ԼՂՀ Էկոնոմիկայի փոխնախարար Սերգեյ Շահվերդյանի խոսքով՝ այս տարի դժվար էր որշում կայացնելը եւ հանձնաժողովի նիստի ավանդական օրը պահպանելը: Բայց դիրքապահները իրենք հուշել որոշումը` օրերս նոր դիրքեր փորող զինվորները վարչություն են ուղարկել հերթական հնագիտական գտածոն:
Միջգերատեսչական հանձնաժողովը իր աշխատանքը սկսեց լռության րոպեով: Ադրբեջանական նկրտումների դեմ հնագետներն էլ են անցած տարի պայքարել: Ազոխի արշավախմբի ղեկավար Լեւոն Եպիսկոպոսյանի խոսքով` Ազոխի քարանձավում իրենց աշխատանքների մասին գիրքը պետքէ լույս տեսներ անցած տարվա սեպտեմբեր -դեկտեմբեր ամիսներին, սակայն շվեցարական տպագրատանը սխալ էին թույլ տվել Ազոխը ներկայացնելով Լեռնային Ղարաբաղում, որը գտնվում է Ադրբեջանում:
Ազոխի մասին գրքի հրատարակումը բողոքարկել է նաեւ Ադրբեջանական դեսպանատունը:
Միջազգային տեսանկյունից չճանաչված տարածքներում մշակութային ժառանգության ուսումնասիրության խնդիրներին անդրադարձավ նաեւ Տիգրանակերտի արշավախմբի ղեկավար Համլետ Պետրոսյանը` նշելով, որ Յունեսկոյի ընդունած փաստաթղթերը անտեսում են չճանաչված երկրներում ապրող մարդկանց մշակութային իրավունքները: Եւ դա, նրա կարծիքով, պետք է ուշադրության կենտրոնում լինի:
Չնայած օրենսդրական խոչընդոտներին օտարերկրացի մասնագետները արցախյան արշավախմբերին մասնակցում են, արտասահմանյան մասնագետներ են ներգրավված Տիգրանակերտի արշավախմբում, իսկ Ազոխի արշավախումբն ինքնին միջազգային է: Ազոխում հայտնաբերված նյութերի վրա աշխարհի 22 համալսարանների մասնագետներ են աշխատում: Պեղումների մասին ամփոփ ժողովածուն կազմված է 15 հոդվածներից: Չնայած խոչընդոտներին այն լույս է տեսնելու այս տարի: