ՅՈՒՆԵՍԿՕ-ի որոշմամբ` 2000 թվականից ի վեր փետրվարի 21-ը նշվում է Մայրենի լեզվի միջազգային օր: Այն նաև հաստատել է ՄԱԿ-ի Գլխավոր վեհաժողովը 2008 թվականին։ Մայրենի լեզվի միջազգային օրը նպատակ ունի նպաստել լեզվական և մշակութային բազմազանությանը և բազմալեզու մշակույթների զարգացմանն ու պահպանմանը։ Լեզվի պետական տեսչության պետ Սերգո Երիցյանն այսօր՝ Մայրենի լեզվի միջազգային օրվան ընդառաջ, անդրադարձել է հայերենի առջև ծառացած հիմնական մարտահրավերներին, կարծիք հայտնել, որ որ նոր Սահմանադրության պահանջներին համապատասխան պետք է օրենսդրական փոփոխություններ ու լրացումներ կատարվեն նաև «Լեզվի մասին » և «Վարչական իրավախախտումների մասին» օրենքներում: ՅՈՒՆԵՍԿՕ-ն արձանագրել է՝ աշխարհի շուրջ 40 լեզու պահպանության խնդիր ունի: Հայերենը բարեբախտաբար այդ ցանկի մեջ չէ: Բարեբախտաբարը՝ արևելահայերենի մասին է, պատկերը մտահոգիչ է արևմտահայերենի դեպքում:
