Պաշտոնական այցով Հայաստան այցելած Սերբիայի Հանրապետության Ազգային ժողովի նախագահ Մայա Գոյկովիչի գլխավորած պատվիրակությունը ՀՀ ԱԺ նախագահի տեղակալ Էդուարդ Շարմազանովի ուղեկցությամբ այսօր այցելել է Ծիծեռնակաբերդի Հայոց ցեղասպանության հուշահամալիր:
Պատվիրակության անդամները ծաղկեպսակ են դրել 1915 թվականի Մեծ եղեռնի հուշահամալիրին, ծաղիկներ խոնարհել անմեղ զոհերի հիշատակը հավերժացնող անմար կրակի մոտ, խոնարհումով եւ լռությամբ հարգել սուրբ նահատակների հիշատակը:
Սերբ խորհրդարանականները եղել են նաեւ Հայոց ցեղասպանության թանգարան-ինստիտուտում, ծանոթացել Ցեղասպանության մասին պատմող նյութերին եւ լուսանկարներին: Սերբիայի Հանրապետության խորհրդարանի նախագահ Մայա Գոյկովիչը գրառում է կատարել հուշամատյանում:
Սերբիայի խորհրդարանական պատվիրակությանն այսօր ընդունել է նաեւ ԱԺ նախագահ Գալուստ Սահակյանը։ Ողջունելով հյուրերին Հայաստանի խորհրդարանում՝ նա նշել է, որ թեեւ հայ-սերբական հարաբերություններն ունեն բազմամյա պատմություն՝ հիմնված փոխադարձ բարյացակամության եւ աջակցության վրա, սակայն Հայաստանի համար անակնկալ էր ԵԽԽՎ-ի վերջին նստաշրջանում հակահայկական երկու բանաձեւերին սերբական պատվիրակության գրեթե բոլոր անդամների աջակցելու փաստը, ինչը, ՀՀ ԱԺ նախագահի խոսքով, հակասում է մեր երկրների միջեւ բազմամյա բարեկամական հարաբերությունների ոգուն, ինչպես նաեւ Սերբիայի պաշտոնական դիրքորոշմանը Ղարաբաղյան հիմնախնդրի վերաբերյալ: Գալուստ Սահակյանն անհրաժեշտություն է համարել երկու երկրների խորհրդարանների միջեւ ակտիվ երկխոսության ձեւավորումը եւ նշել, որ այդպիսով, գուցե, հնարավոր կլինի շտկել Սերբիայի պատվիրակության քվեարկության հետեւանքով ստեղծված իրավիճակը:
Անդրադառնալով տարածաշրջանային հարցերին՝ Ազգային ժողովի նախագահը նշել է, որ Հայաստանի արտաքին քաղաքականության առաջնահերթություններից է Լեռնային Ղարաբաղի հիմնախնդիրը, որի հանգուցալուծումը Հայաստանը տեսնում է միջազգային հանրության կողմից ընդունված միակ ձեւաչափի՝ ԵԱՀԿ Մինսկի խմբի եռանախագահության շրջանակում: «Չնայած նրան, որ Ադրբեջանն ամեն կերպ փորձում է խոչընդոտել հիմնախնդրի խաղաղ կարգավորմանը՝ մենք շարունակելու ենք հավատարիմ մնալ հակամարտությունը բանակցային ճանապարհով լուծելու մեր դիրքորոշմանը՝ չտրվելով հակառակ կողմի սադրանքներին»,-ընդգծել է պարոն Սահակյանը:
Խորհրդարանի ղեկավարը, անդրադառնալով Հայաստանի եւ Սերբիայի միջեւ տնտեսական սերտ կապերի ձեւավորմանը, նշել է. «Պետք է երկուստեք օգտագործել առկա ներուժը շոշափելի արդյունքների հասնելու համար՝ ի նպաստ երկու ժողովուրդների բարօրության»:
Գալուստ Սահակյանը նշել է, որ Հայաստանի արտաքին քաղաքականության կարեւորագույն հարցերից է նաեւ Հայոց ցեղասպանության ճանաչումը՝ ընդգծելով, որ Հայաստանի Հանրապետությունն ամեն ջանք գործադրելու է միջազգային հանրության կողմից Հայոց ցեղասպանության լիարժեք ճանաչմանը հասնելու համար:
Սերբիայի Հանրապետության Ազգային ժողովի նախագահ Մայա Գոյկովիչը, շնորհակալություն հայտնելով ընդունելության համար, արժեւորել է երկու երկրների բարեկամական հարաբերությունները, մասնավորապես միջխորհրդարանական համագործակցության խորացումն ու երկկողմ կապերի ակտիվացումը: Մայա Գոյկովիչը, կարեւորելով փոխգործակցությունը միջազգային կառույցներում, առաջարկել է երկու խորհրդարանների համագործակցությունն ակտիվացնել: Անդրադառնալով Լեռնային Ղարաբաղի հակամարտությանը՝ նա նշել է, որ Արցախի հիմնախնդիրը պետք է կարգավորվի ԵԱՀԿ Մինսկի խմբի շրջանակներում, մադրիդյան սկզբունքների հիման վրա:
Նա երախտիքի խոսք է հայտնել Հայաստանին՝ Կոսովոյի հարցում Սերբիայի ինքնիշխանությունը եւ տարածքային ամբողջականությունը պաշտպանելու համար:
ՀՀ Ազգային ժողովի նախագահ Գալուստ Սահակյանը եւ Սերբիայի Հանրապետության Ազգային ժողովի նախագահ Մայա Գոյկովիչը խորհրդարանում ունեցած հանդիպումից հետո հանդես են եկել համատեղ հայտարարությամբ՝ ամփոփելով հանդիպման արդյունքները: Այնուհետեւ խորհրդարանի այգում` «Հիշողության պուրակում», տնկել են եղեւնի:
