Տնտեսական

Շուկայում բարձր արժեք ունեցող խաղողի սեղանի սորտերը դեռ մնացել են այգիներում

satikisahakyan
Արմավիրի մարզում խաղողի սեղանի սորտերը ցածր գներով մթերվում են Պռոշյանի կոնյակի գործարանի Արմավիր գյուղի մասնաճյուղում:  Մթերվել է շուրջ 1200տոննա խաղողի սեղանի սորտեր, որոնք անցած տարի բարձր գներով արտահանվել են կամ էլ վաճառվել շուկայում: Այս տարի այգեգործները ստիպված են մթերել և համաձայնվել գործարանի առաջարկած գնի հետ, քանի որ իրացման այլ ճանապարհներ  չունեն: Այլապես բերքը մնալու է այգիներում կամ էլ թափվելու է:

 

Արմավիրի մարզի այգիներում մնացել է այն խաղողը, որ տարիներ շարունակ արտահանվել է այլ երկրներ, իսկ տեղական շուկայում էլ վաճառվել մեկ կիլոգրամը 400-500 դրամով:  Դրանք սեղանի սորտի խաղողներ են :  Հիմնական  մեծ շուկան  Ռուսաստանն էր, որտեղ տիրող տնտեսական ճգնաժամը, ռուբլու արժեզրկումը  կրախի առաջ են կանգնեցրել  հայ  գործարարներին:   Արդյունքում տուժում է արտադրողը: Գյուղացիների մշակած բերքը մնալով այգիներում փչանում է, կորցնում` տեսքն ու համը:

Գյուղացիների զայրույթը զսպելու  և նրանց աջակցելու նպատակով գործարանը  մարզպետարանի միջնորդությամբ շարունակում է  խաղողի տեխնիկական սորտի հետ մեկտեղ նաև սեղանի սորտերի մթերումը: Գործարանի գինեգործ  Արարատ Եղիազարյանը նշեց, որ  նախատեսված  5000-6000տ խաղողի փոխարեն արդեն մթերել են 8000տ:

Մեկ կիլոգրամը 140-150 դրամով ընդունել են միայն խաղողի տեխնիկական սորտերը: Գործարանը ընդունում է կոնյակի և գինու  հումք հանդիսացող խողողի   մեղրաբույր, կանգուն, մսխալի, գառան դմակ, ներկենի, կարմրահյութ, քիչ քանակությամբ էլ՝ ոսկեհատ սորտերը :

Ներկայում Պռոշյանի կոնյակի գործարանի Արմավիրի մասնաճյուղը  մթերում է նաև շուկայում բարձր արժեք ունեցող խաղողի սեղանի սորտերը, որոնք գործարանում լրիվ արժեզրկված են: Պատասխանատուների հավաստիացմամբ այդ խաղողների ցածր շաքարայնությունը չի համապատասխանում նախատեսված չափանիշերին:  Մթերող գյուղացիները ճնշված ու ընկճված էին, դրանից ելնելով էլ չցանկացան  կիսել իրենց մտահոգությունները: Մթերման գործընթացին էին հետևում  Արմավիրի փոխմարզպետ Դավիթ Սամսոնյանն ու գյուղատնտեսության  բաժնի պետ Մարտիրոս Սարիբեկյանը: Գործարանում 15 տոկոս շաքարայնության սեղանի սորտերն ընդունում են մեկ կիլոգրամը 60 դրամով, իսկ 20 տոկոս շաքարայնությամբ  խաղողը ՝ 80 դրամով, որի դիմաց  կվճարեն երեք ամիս հետո: Երեկվա տվյալներով Պռոշյաի կոնյակի գործարանի Արմավիրի մասնաճյուղում մթերվել է 1200տ  սեղանի խաղող: Տարաներն ազատելու նպատակով սկսել են թորման աշխատանքները, իսկ որքան կկարողանան ընդունել՝ գինեգործը դժվարացավ պատասխանել, քանի որ տարաները քիչ են դատարկվում:

Գործարանի  դիմաց  շարված են սպիտակ խաղողով բեռնված մեքենաները, այգետերերն էլ մեկ մարդու նման լուռ սպասում էին իրենց հերթին:

Այս դեպքում դժվար է ասել որն է գյուղացու համար ավելի  լավ՝ բարենպաստ տարին՝ առատ բերքով, թե՝ անբարենպաստ տարին՝ ոչնչով,  երկու դեպքում էլ արդյունքը նույնն է:

Back to top button