Սպորտ

Երևանում սպասվում է սառցե հեքիաթային տոն

arammanukyan

Սառույցի արքա Եվգեննի Պլյուշչենկոն Հյաստանում է: Օլիմպիական խաղերի կրկնակի, աշխարհի եռակի և Եվրոպայի առաջնության 7 ակի չեմպիոնը պատրաստվում է նոյեմբերի 20-ին Երևանում կայանալիք շոուին: 2.5 ժամ տևողության շոուն իր մեջ ներառելու է աշխարհի լավագույն գեղասահորդների պրոֆեսիոնալ կատարումներ, գեղասահորդ ակրոբատների անհավանական ցատկեր ու ֆանտաստիկ համարներ, լուսային ու ձայնային  առանձնահատուկ լուծումներով հեքիաթային բեմադրություն:  Պլյուշենկոյի ելույթը կուղեկցվի ջութակահար, երգահան բազմաթիվ մրցույթների հաղթող Էդգար Հակոբյանի նվագակցությամբ: Լրագրողների հետ հանդիպման ժամանակ Պլյուշչենկոն նշեց, որ մեծ ուրախությամբ է Հայաստանում հերթական անգամ մասնակցելու շոու ծրագրին:

«2008-ին, երբ ես Հայաստանում էի երկու ցուցադրական ելույթ ունեցա և զգացի հայ ժողովրդի մեծ հետաքրքրությունը գեղասահքի նկատմամբ: Երբ ես ելույթ էի ունենում «Արմենիա մոյա» երգի տակ, նկատեցի մի կին ինչպես է  հուզվել ու լացում: Այստեղ սիրում ու գնահատում են գեղեցիկը: Ես իհարկե ավելի վաղ կգայի Հայաստան, եթե չորոշեի շարունակել մեծ սպորտը: Այժմ ես սպորտային մրցելույթներին դադար եմ տվել: Այս մրցաշրջանում մրցաշարերում ելույթ չեմ ունենա և միայն հանդես կգամ շուոներում: Իմ գործակալ Արի Զաքարյանի հետ մենք նախատեսել ենք  համաշխարհային մեծ շրջագայություն, ինչը իրենից ներկայացնում է  մոտ 100  ցուցադրական ելույթ: Նոյեմբերի 20-ին Երևանում կներկայացնեմ նոր ծրագիր, որով ես հանդես կգամ նաև հաջորդ մրցաշրջանում»:

Պլուշչենկոն խոստացավ, որ նոյեմբերի  20-ին Երևանում գեղասահքի մեծ տոն կլինի: Ընդհանուր առմամբ «Սառցե թագավորները» շոուին կմասնակցեն ավելի քան 20 գեղասահորդներ այդ թվում աշխարհի կրկնակի և Եվրոպայի բազմակի չեմպիոն Իրինա Սլուցկայան, 2011 թվականի Եվրոպայի առաջնության բրոնզե մեդալակիր Թոմաշ Վերները և էլի շատ ու շատ աշխարհահռչակ գեղասահորդներ:  Խոսելով մարզական կարիերայի մասին՝ 32 ամյա Պլյուշչենկոն նշեց, որ ինքը դեռ շարունակելու է  իր խոսքն ասելու է ամենաբարձր մակարդակի մրցաշարերում:

«Վերջերս եղավ ապատեղեկատվություն, որ ես վնասվածք եմ ստացել ու վիրահատության ենթարկվել: Բայց փառք Աստծո այդպիսի բան չկա: Ես շարունակում եմ մարզվել ու դա անում եմ ամեն օր: Ցանկանում եմ 5-րդ անգամ մասնակցել օլիմպիական խաղերին և աշխարհում լինել միակ գեղասահորդը,  որը  5 անգամ մասնակցել է օլիմպիական խաղերին: Ինձ շատ են խորհուրդ տալիս թողնել գեղասահքը, զբաղվել բիզնեսով կամ մեկ այլ գործով, բայց ես սիրում եմ սպորտը, սիրում եմ սառույցը: Իհարկե կգա ժամանակ, որ ես կասեմ շնորհակալություն ու կհեռանամ: Բայց դեռ  դրա ժամանակը չէ. ես այստեղ եմ և դեռ ասելիք ու անելիք ունեմ»:

Խոսելով Հայաստանում գեղասահքի զարգացման մասին՝ Պլյուշչենկոն նշեց, որ նման պայմաններում դժվար է մարզաձև զարգացնել:

«Ցավոք Հայաստանում չկա գեղասահքի մարզդպրոց, այստեղ այս մարզաձևը կարծես մեռած լինի: Եղավ մի պահ, երբ նույնիսկ ինձ հրավիրեցին և իմ անվան մարզադպրոց բացեցին: Բայց դա ընդամենը մեկ պահ տևեց: Եթե 12 ամսվա ընթացքում ընդամենը միք քանի ամիս է երկրում սառցադաշտ գործում այդեղ գեղասահքի զարգացման մասին դժվար է խոսել: Ռուսաստանում յուրաքանչյուր ամիս նոր սահադաշտ է բացվում  և դա երեխաներին բերում է դեպի սպորտ կտրում արատավոր երևույթներից: Աշխարհում շատ հայտնի  հայ մարզիկներ կան, որոնք հաջողությամբ մարզվում ու ներկայացնում են այլ երկրներ: Վստահ եմ, եթե այստեղ պայմաններ լինեն նրանք մեծ հաճույքով կմարզվեն Հայաստանում ու կներկայացնեն Ձեր երկիրը»:

Պլյուշչենկոն նաև նշեց, որ առաջիկա օլիմպիական խաղերում Ռուսաստանի հավաքականի կազմում նույնիսկ հայ կլինի, ով նաև մեդալի հավակնորդ է:

Back to top button