Մշակույթ

Օբյեկտիվից երեւացող երջանկությունը. Արա Գյուլերի ցուցահանդեսը՝ Թբիլիսիում

gitaelibekyan
Թբիլիսիիում բացվել է պոլսահայ հայտնի նկարիչ Արա Գյուլերի լուսանկարների ցուցաhանդեսը: Լուսանկարիչն իր արխիվից Թբիլիսիի է ուղարկել տասնյակ  գործեր`բոլորի վրա անձամբ ստորագրելով: Դրանց մեջ են նաև Վիլյամ Սարոյանի  (1974 թ.) ու Սերգեյ Փարաջանովի (1989թ) լուսանկարները:  Գյուլերի աշխատանքները  ներկայացվել են  աշխարհի տարբեր երկրներում, սակայն Թբիլիսիիում  դրանք   ցուցադրվում են առաջին անգամ: Ցուցահանդեսը, որ  կազամակերպել են Վրաստանի Ազգային թանգարանն ու Վրաստանում Թուրքիայի դեսպանատունը  բաց կլինի մինչև  հոկտեմբերի 31-ը:

 

«Ես միշտ վազել եմ երջանկության հետևից, բայց չեմ կարողացել այն ձեռքս վերցնել.  ինձ համար երջանկությունն այն է, ինչ ես տեսնում եմ օբյեկտիվի միջից»: Մի առիթով ասել է Արա Գյուլերը, ում հաջողվել է  նկարել  այնպիսի աշխարհահռչակ մեծերի, ինչպիսին են Պաբլո Պիկասոն, Սալվադոր Դալին, Վիլյամ Սարոյանը, Ուինսթոն Չերչիլը,  Բերնարդ Ռասսելը,  Ինդիրա Գանդին, Սոֆի Լորենը, Սերգեյ Փարաջանովը և շատ ուրիշներ: Լուսանկարչի համար կարևորը նրանց բնավորությունը ցույց տալն է և ոչ թե  գեղեցկությունը, որն ըստ նրա անցողիկ է:

«Փարաջանովն  իմ շատ մտերիմ ընկերն է եղել, մի քանի անգամ նկարել եմ  նրան, իսկ նա իմ  նկարները կտրել ու կոլաժներ է պատրաստել»:  Փարաջանովի մասին ասել է Գյուլերը, թբիլիսյան ցուցահանդեսին ուղարկելով 1989թ. արված Փարաջանովի լուսանակարը:  Ինչպես «Ռադիոլուրի» հետ զրույցում նշեց Վրաստանում Թուրքիայի դեսպան Լևենտ Գյումրուքչուն,  Փարաջանովի այս լուսանկարը  Գյուլերն արել է Ստամբուլում,  և շատ մեծ ցանկություն ուներ լինել այն քաղաքում, որտեղ ապրել է կինոռեժիսորը, սակայն առողջական  խնդիրների պատճառով չկարողացավ. «Նա մեզ համար շատ յուրահատուկ նկարիչ է, և պատահական չէ, որ անվանում ենք Ստամբուլի աչք, որովհետև այն, ինչ հիշում ենք Ստամբուլի մասին լավագույնս պատկերված է Գյուլերի լուսանկարներում»,- ասում է դեսպանը՝ հավելելով, որ Արա Գյուլերը ոչ միայն Թուրքիայի լավագույն լուսանկարիչն է, այլև աշխարհի լավագույններից մեկը.

«Նրանով հպարտանում ենք մենք: Նա ազգությամբ հայ է, որ ծնվել է Ստամբուլում, իր   ողջ կյանքն անցկացրել այդ քաղաքում: Գյուլերի  նկարներում տեսնում ենք մարդկանց, քանի որ սիրահարված է  նրանց, նաև  Թուրքիայի  պատմության մի հատվածը, որը նրա նկարների միջոցով ներկայացվում է ողջ աշխարհին»:

Աշխարհառչակ հայազգի լուսանկարիչը ծնվել է  Ստամբուլում` հայկական Բեյօղլու թաղամասում: Ավելի քան 60  տարի զբաղվել է ֆոտոլրագրությամբ, հեղինակելով շուրջ  800.000 լուսանկար: Համագործակցել է միջազգային հեղինակավոր լրատվամիջոցների հետ, աշխարհի տարբեր երկրներում ստացել բազմաթիվ  մրցանակներ:

Back to top button