Հասարակություն

Երեւանում անցկացվում է «Հարթակ» փառատոնը` սննդից մինչեւ առողջ ապրելակերպ

lianaeghiazaryan
Առողջ ապրելակերպ, արվեստ և արհեստ, խոհարարություն, տեխնոլոգիաներ: Սրանք այս օրերին Երեւանում անցկացվող : «Հարթակ» փորձի փոխանակման փառատոնի հիմնական խորագրերն են: Մաշտոցի պուրակը այսօր եւ վաղը կշարունակի մնալ փառատոնին ներկայացված յուրահատուկ սեղանիկներով զարդարված: Այսօր ցուցադրվում են տարբեր կերակրատեսակներ` նաեւ մեր քիմքին ու աչքին ոչ սովոր բաղադրատոմսերով` դդմի ծաղկով փաթաթված տոլմա, գազարով տորթ, գառան մսով ու ծիրանաչրով ուտեստներ եւ այլն: Փառատոնի վաղվա թեման առողջ ապրելակերպն է:

 

Երեւանի Մաշտոցի պուրակում հոկտեմբերի 16-18-ն անցկացվում է յուրահատուկ միջոցառում: «Հարթակ» փորձի փոխանակման փառատոնն առաջին անգամ մեկնարկում է Երևանում: Նպատակն է ստեղծել մի հարթակ, որտեղ մասնակիցները սովորելու, փորձելու, անձնական փորձով կիսվելու հնարավորություն կստանան վարպետության դասերի, պրակտիկ սեմինարների, փորձագետների ելույթների միջոցով: Մանուշակ Վահրամյանը փառատոնի համահիմնադիրներից մեկն է, նախաձեռության նպատակը բացատրում է այսպես`

«Նախագծի ծրագիրը կազմված է 4 հիմնական բաժիններից՝ առողջ ապրելակերպ, արվեստ և արհեստ, խոհարարություն, նոու-հաու: Վարպետության դասրեով գալիս են կիսվելու տարբեր մասնագետներ»:

Եռօրյա փառատոնի այսօրվա խորագիրը մաքուր սնունդն է: Մի քանի տասնյակ սնունդ արտադրողներ ներկայանում են ոչ միայն առօրյա, այլեւ խիստ յուրահատուկ սննդատեսակներով: Վարպետ խոհարարներն առաջարկում են համտեսել դրանք, նաեւ պատրաստ են կիսվել իրենց բաղադրատոմսերի գաղտնիքներով: Քիմքին ու աչքին ոչ սովոր բաղադրատոմսերից փառատոնի համահիմնադիր Մանուշակ Վահրամյանը առանձնացնում է հետեւյալը:«Մայաների բաղադրատոմսով շոկոլադ է պատրաստվելու, կան բուսական հատուկ կերակրատեսակներ, սփյուռքահայ խոհարարուհին ունի հետաքրքիր նորություններ»:

Կարապետ Կույումջյանը վարպետ խոհարար է, «Հարթակ» փառատոնին նրա ներկայացրած սեղանիկը զարդարում է դդմի ծաղկով փաթաթված տոլման: Սա հին ավանդական հայկական ուտեստ է, բացատրում է մասնագետն ու նկատում, որ տարբեր մարզերում դդմի ծաղկով տոլման տարբեր ձեւերով է պատրաստվում: Սրա յուրահատկությունը ոչ միայն ձեւավորումն է, բաղադրությունը, այլեւ այն, որ սա կարելի է ուտել միայն տարվա կոնկրետ շրջանում, երբ ծաղկում է դդումը: «Դդմի ծաղկի նեկտարը միախառնվում է գառան մսի, ծիրանաչրի հետ: Այս համեղ համադրությունը պետք է անպայման համտեսել»:

Տոլմա «Ուդուլին» եւս այսօրվա փառատոնին ներկայացվող յուրահատուկ ուտեստներից է: Սրա բաղադրատոմսը ձեռք է բերվել Մատենադարանում պահվող ձեռագրերից: Համի մասին վարպետ խոհարար Կարապետ Կույումջյանը պատմել չի կարող, խորհուրդ է տալիս փորձել, բայց փոխարենը կիսվում է բաղադրատոմսով:

«Ծեծված գառի միս` ծիրանաչրով, նանայով, շատ համեղ է ստացվում»:

Գալուստը փառատոնին ներկայացնում է արեւելյան համեմունքներով պատրաստված քաղցրավենիքով ծանրաբեռնված սեղանիկը: Բաղադրիչների` շատ դեպքում մեզ համար անսովոր համադրություն ներկայացնելուց այստեղ չեն խուսափում: Գալուստը գազարով տորթն է մատնանշում: «Մենք առաջարկում ենք պարտադիր փորձել: Մարդիկ առաջին անգամ երբ լսում են` տարակուսում են` ինչպես թե գազարով տորթ: Բայց հիմա կան հաճախորդներ, որ հենց այն համտեսելու համար են գալիս»:

Հայաստանը գինեգործական իր հարուստ ավանդույթներով միշտ հպարտանում է, սակայն գինու մատուցման, պահպանման, ճանաչման տեսակետից երբեմն գիտելիքները թերի են: «Հարթակ» փորձի փոխանակման փառատոնի շրջանակներում պրոֆեսիոնալ սոմելիե Անիկ Պետրոսյանը փոխանցում է իր խորհուրդները: Եթե գինին շատ երիտասարդ է, խմելուց առաջ այն անպայման պետք է օդափոխել` լայն անոթի մեջ շարժելով: Սպիտակ գինին պետք է մատուցել 7-12 աստիճան, կարմիրը` 14-20 աստիճան ջերմությամբ` բարձր պոչով բաժակներով, որպեսզի ձեռքի ջերմաստիճանը չփոխանցվի գինուն: Ամեն դեպքում շատ կարեւոր է իմանալ` ինչ ծագում ունի գինին,  ինչ հողի խաղողից է պատրաստված եւ այլն: Բացված գինին 3 օրից ավելի պահել չի կարելի: «Սպիտակ գինին կարելի է պահել սառնարանում, կարմիրը` ոչ, պետք է պահել սենյակային ջերմաստիճանում: Փակ գինին պետք է պահել հորիզոնական` «պառկած» վիճակում, լույսից հեռու, աղմուկներից ու տատանումներից հեռու»:

Վաղը Մաշտոցի պուրակում «Հարթակ» փորձի փոխանակման փառատոնի շրջանակներում կներկայացվի առողջ ապրելակերպ թեման` իրեն բնորոշ արտադրատեսակներով ու այս ոլորտի մասնագետների մասնակցությամբ:

Back to top button