Տնտեսական

Խաղողի մթերումն աստիճանաբար կարգավորվում է

satikisahakyan

Խաղողի  իրացման հարցը աստիճանաբար կարգավորվում է։ Արմավիրի մարզի Ամասիա գյուղում նախագահի հանձնարարականից հետո երեկվանից վերսկսել են խաղողի մթերումը, ընդունվելու է 1000 տոննա խաղող: Պայմանագիր չունեցող այգեգործների խաղողը մթերվում է Մյասնիկյանի գինու գործարանում: Երեկ գործարանում է եղել տարածքային կառավարման և արտակարգ իրավիճակների նախարար Արմեն Երիցյանը։ Իսկ այսօր  Էջմիածինցի այգեգործներն են սեղանի սորտի խաղողի իրացման խնդրով  դիմել մարզպետին:

 

Մյասնիկյանի գինու գործարանի մուտքի մոտ օրերով հերթի կանգնած խաղող մթերող այգեգործներն են միմյանց հետ վիճում  այգեգործությունը բանջարաբոստանայինով  փոխարինելու մասին, քանի որ բերքի  իրացումը գյուղացիների համար  դարձել է  հոգս:  Տարբեր գյուղերից  պայմանագիր չունեցող գյուղացիների խաղողը մթերվում է    Մյասնիկյանի գինու գործարանում՝  «Գինու կոնյակի տուն Շահնազարյաններ» ՍՊԸ- ում։

Գործարանն աշխատում է 6 ժամյա ընդմիջումով: Խաղողը մթերում են մինչև լուսաբաց: Ընկերության արտադրամասի վարիչ Սամվել Ասիրբեկյանը տեղեկացրեց, որ մթերելու են մինչև 6500 տոննա խաղող՝ մեկ կիլոգրամը 135-150 դրամ արծողությամբ:

Խաղողի մթերման խնդիրներով հետաքրքրված՝ երեկ գործարան էր այցելել տարածքային կառավարման ու արտակարգ իրավիճակների նախարար Արմեն Երիցյանը և խոստացել անել ամեն հնարավորը ամբողջ  բերքը մթերելու համար:

Խաղողով բեռնված մեքենաների բերքը թթվում է օրերով տարբեր գործարանների առջև սպասելուց, քացախանում է  և գյուղացին ստիպված թափում է, ասել է թե ջուրն է լցնում իր ողջ տարվա քրտինքը և այն եկամուտը, որն սպասում էր բերքի իրացումից՝ պարտքերը մարելու նպատակով:

Մյասնիկյանի գործարանի արտադրամասի վարիչ  Սամվել Ասիրբեկյանը նշեց, որ քացախացած խաղողով մեքենաները հետ են դարձրել, որպեսզի չփչացնեն գինին:

Խաղողի «Այվազյան» սորտի մթերման խնդրի առջև են կանգնել Էջմիածնի Զվարթնոց թաղամասի այգեգործները: Նրանք այսօր հանդիպել են Արմավիրի մարզպետ Աշոտ Ղահրամանյանի հետ՝ խնդրելով օգնել  իրացնել  բերքը: Անցած տարի նրանք ամբողջ խաղողն իրացրել են Սասունիկի «Արմենիա վայն» գործարանում, որն այս տարի պայմանագիր չի կնքել  էջմիածինցի այգեգործների հետ: Մասիսում նույնպես չեն ընդունել:

Անցած տարի սեպտեմբերի կեսին արդեն խաղող չունեին, իսկ  այս տարի դեռ խաղողը չեն քաղել, հասունանում և  թափվում է:  Մարզպետ Աշոտ Ղահրամանյանն  ընդունել է խաղողագործներին և պայմանավորվել բերքը մթերել Մյասնիկյանի գինու գործարանում մեկ կիլոգրամը  135 դրամով:

Նախագահի հանձնարարությամբ  երեկվանից վերաբացվել է Երևանի գինու, կոնյակի և օղու գործարանի Ամասիայի մասնաճյուղը, որը մթերելու է 1000 տոննա խաղող:

Back to top button