Հասարակություն

Վաղվանից անձրեւները կդադարեն

aidaavetisyan
Այս տարվա հոկտեմբերն աչքի է ընկել  ամպրոպային ակտիվ գործունեությամբ: Ամսի մեկից մինչ օրս  հանրապետության տարածքը գտնվում է ցիկլոնի ազդեցության գոտում և այս 9 օրերի ընթացքում հանրապետության ողջ տարածքում դիտվել են  ամպրոպներով ուղեկցված անձրևներ: Տեղումները  կշարունակվեն մինչև  առաջիկա   գիշեր: Վաղվանից ցիկլոնը, ըստ ՀՀ ՏԿ և ԱԻՆ «Հիդրոմետ» ծառայության օդերևութաբանության պետի տեղակալ  Գագիկ Սուրենյանի,  կտեղափոխվի դեպի արևելք և կեսօրից հետո հանրապետությունում  կդիտվի  տեղումների դադար և եղանակի պարզեցում: Սակայն հանրապետության որոշ հատվածներում կդիտվի նաև ցրտահարություն:

 

 

Արտառոց օդերևութաբանական երևույթները ոչ միայն Հայաստանում, այլ ամբողջ աշխարհում գնալով ավելանում են:  Այս տարվա հոկտեմբերը օդերևութաբանները նույնպես համարում են  արտառոց օդերևութաբանական երևույթներով ուղեկցվող  ամիս: Պայմանավորված բարձր ջերմային ֆոնով՝ հոկտեմբերի առաջին տասնօրյակում ՀՀ ողջ տարածքում նկատվում են անձրևի տեսքով տեղումներ, ինչն էլ մեր գյուղատնտեսության համար  արդյունավետ էր, նշում է  ՀՀ ՏԿ և ԱԻՆ «Հիդրոմետ» ծառայության օդերևութաբանության պետի տեղակալ  Գագիկ Սուրենյանը և ավելացնում, որ աշնանացանի բերքատվությունը կապված է հոկտեմբերի տեղումների քանակից: Վաղվանից հանրապետության տարածքում տեղումները կդադարեն, սակայն  որոշ հատվածներում  կնկատվի ցրտահարություն:

«Հոկտեմբերի 10-ի լույս 11-ի գիշերը՝ պայմանավորված  եղանակի պարզեցմամբ և լրացուցիչ հյուսիս-արևմուտքից արկտիկական ցուրտ օդային հոսանքների  ներթափանցմամբ՝ գիշերային ժամերին սպասում ենք ջերմաստիճանի անկում մոտ 4-ից 5 աստիճանով: Եվ լեռնային մի շարք շրջաններում  կա ցրատահարության վտանգ»:

ՀՀ Գյուղատնտսության փոխնախարար Գառնիկ Պետրոսյանն էլ «Ռադիոլուրի» հետ զրույցում նշեց, որ  տարվա այս եղանակին հանրապետության բարձրադիր գոտիներում նման  ջերմաստիճանների գրանցումը  օրինաչափ երևույթ է: Այս ժամանակահատվածում գյուղատնտեսներին մնում է արագ կազմակերպել բերքահավաքը:

«Այս պարագայում մենք խորհուրդ ենք տալիս գյուղացիական տնտեսություններին արագ հավաքել այն բանջարեղենները, պտուղները, որոնք  հնարավոր են վբնասվել: Այս տարածաշրջաններում կարելի է համարել, որ առանձնապես վտանգի ենթական բանջարեղեններ ու պտուղներ չկան»:

Հոկտեմբերի 11-12-ին  հանրապետության ողջ տարածքում կդիտվի առանց տեղումների եղանակ, հանրապետության տարածք կներթափանցեն տաք օդային հոսանքներ և  հոկտեմբերի 12-ին Արարատյան դաշտավայրում  օդի ջերմաստիճանը կբարձրանա 3-ից 4 աստիճանով՝ հասնելով մինչև 23-ից 24 աստիճան տաքության: Սակայն  դրանից հետո  հանրապետության տարածքին կմոտենա տեղումնաբեր ցիկլոն, և հոկտեմբերի  13-ից 15-ը սպսավում են տեղումներ, սակայն օդի ջերմային ֆոնում էական փոփոխություններ չեն կանխատեսվում:

Նշենք, որ առաջիկա 10 օրերին Արարատյան դաշտում ցրտահարության վտանգ չի նկատվում, քանի որ ցուրտ օդային հոսանքների ներթափանցում այդ տարածքում  չի կանխատեսվում: Սակայն հանրապետության մի շարք լեռնային գոտիներում, ըստ օդերևութաբանի, արդեն  ձնածածկույթ է նկատվում:

Back to top button