Հասարակություն

Յոթ մլն դոլար՝ Երեւանի 28 փողոցների լուսավորության համար

lusinevasilyan

Խորհրդարանն այսօր ձայների    98 կողմ,     4 դեմ,  10 ձեռնպահ հարաբերակցությամբ առաջին ընթերցմամբ ընդունել է ՀՀ քաղաքացիական օրենսգրքում փոփոխություններ նախատեսող օրինագիծը: Փոփոխությունները վերաբերում են  բանկային հատուկ հաշիվների  իրավական կարգավորմանը:

ԱԺ-ն նաև համաձայնություն է տվել «Երեւանի քաղաքային լուսավորության ծրագիր» վարկային պայմանագրին: Նախատեսվում է Երեւանի 28 փողոցներում ներդնել էներգախնայող և անվտանգ արտաքին լուսավորության ցանց: Ծրագրի կապիտալ արժեքը 7 մլն դոլար է, որից 3 մլն-ը՝ դրամաշնորհ է, 4 մլն-ը՝վարկ Վերակառուցման և զարգացման եվրոպական բանկից:

Մինչև քվեարկությունը խմբակցություններից ԲՀԿ-ն է հստակեցրել իր դիրքորոշումը. Միքայել Մելքումյանն ասել է, որ այս վարկը մայրաքաղաքին խիստ անհրաժեշտ է: «Վարկային ծրագրերին մենք սովորաբար դեմ կամ ձեռնպահ ենք լինում, բայց սա այն վարկն  է, որը խիստ անհրաժեշտ է Երևանին: Մենք հստակ կողմ ենք»:

Տիգրան Ուրիխանյանը հակառակ կարծիքն է հայտնել՝ սեփական բյուջեն ունեցող  Երևանին նոր վարկեր անհրաժեշտ չեն: «Հատկապես Երևանի վերաբերյալ, որն ունի բյուջե և անհամաչափ ծախսեր, վարկային ծրագիր քննարկելն ինձ համար անհասկանալի է: Ես դեմ եմ, որովհետեև Երևանը ունի շատ ավելի փող, քան անհրաժեշտություն փող վերցնելու»:

Վարկային համաձայնագիրն ընդունվել է 103 կողմ, 5 դեմ, 6 ձեռնպահ ձայներով:

Back to top button