Ճարտարապետների համահայկական 3- րդ համաժողովը համախմբել է Հայաստանում և Սփյուռքում գործող հայ ճարտարապետների: Այն այս տարի ընթանում է Հայոց ցեղասպանության 100-րդ տարելիցի միջոցառումների շրջանակում եւ անցկացվում է Սփյուռքի նախարարության նախաձեռնությամբ, Քաղաքաշինության նախարարության, Ճարտարապետների և ճարտարագետների համահայկական ընկերակցության, ՀՀ ճարտարապետների միության աջակցությամբ: Այսօր այս 4 կողմերի միջև կնքվելէ հուշագիր՝ հետագա համագործակցության համար:
Երևանն այսօր ճարտարապետական առումով շատ ծանր վիճակում է գտնվում: Ամբողջությամբ խախտվել են մայրաքաղաքում ժամանակին ձևավորված բոլոր հիմնարար սկզբունքները: Նոր շենքեր են կառուցվում առանց կանաչ գոտիների, մանկական խաղահրապարակների: Ճարտարապետ Անահիտ Թարխանյանն ասում է, որ այս իրավիճակը կարող է երկար շարունակվել, քաղաքական կամքի և օրենքի բացակայության պատճառով:
Ճարտարապետ Թարխանյանը թերթելով Երևանի շենքերի պատմության էջերը տեսնում է, որ այս կամ այն ծրագրի ներքո բազմաթիվ խոստումներ են տրվել, որ շենքերը չեն քանդվելու, կամ էլ քանդվելուց հետո նոր ժամանակակից շենքեր են կառուցվելու: Սակայն այսօր պնդում է, որ շենքերը պարզապես չպետք է քանդել։ Անահիտ Թարխանյանը մտադիր է խնդիրները ևս մեկ անգամ բարձրաձայնել Սփյուռքի նախարության նախաձեռնությամբ կազմակերպված ճարտարապետների 3 –րդ համաժողովում, որ այս օրերին տեղի է ունենում Երևանում:
Նկատենք, որ Ճարտարապետների 3 –րդ համաժողովն անցկացվում է Ցեղասապանության 100- ամյա տարելիցի միջոցառումների շրջանակներում: Այն համախմբել է Սփյուռքի ու Հայաստանի ճարտարապետներին: «Գիտաժողովին քննարկվելու են սեյսմակայունության, կանաչ ճարտարապետության վերաբերյալ նորություններ, ժառանգության պահպանության և բազմաթիվ այլ հարցեր»,- ասում է Ճարտարապետների միության նախագահ Մկրտիչ Մինասյանը: Սփյուռքի նախարար
Հրանուշ Հակոբյանն էլ խնդրանքով դիմեց ճարտարապետներին ու շինարարներին, որպեսզի 
նրանք դառնան մշակութային հսկայական ժառանգության կորուստի հաշվառման, ճշգրտման և դասման նախաձեռնողն ու իրականացնողը, քանի որ Ցեղասապանության պահանջատիրության հարցն առաջ քաշողների շարքում պատմաբանների կողքին պետք է լինեն նաև ճարտարապետները: Նախարարը աշխարհասփյուռ հայ ճարտարապետներին և շինարարներին նաև կոչ արեց, որպեսզի աշխատանքային խումբ ստեղծեն հետագա համագործակցության համար:
Հիսուն տարի առաջ Ծիծեռնակաբերդի բարձունքում վեր խոյացավ Ցեղասապանության հուշահամալիրը, որի համահեղինակ ճարտարապետներից էր Արթուր Թարխանյանը, իսկ ահա 100- ամյակին ընդառաջ Լիբանանում ապրող Թարխանյան եղբայներին էլ վստահվեց Հայոց ցեղասպանության որբերի` «Արամ Բեզիկյանի» անունը կրող թանգարանի ճարտարապետական և ներքին հարդարման աշխատանքները, ինչպես նաև Հայոց ցեղասպանության զոհերի հուշահամալիրի վերակառուցումը:
Ազգանվան համընկնումը զուգադիպությունը է : Եղբայրներն այստեղ հանդիպել ու ծանոթացել են ճարտարապետի դստեր՝ Անահիտ Թարխանյանի հետ: Րաֆֆին Հայաստանում վերջին անգամ եղել է 2008 թ-ին ու ասում է, որ այս մի քանի տարիների ընթացքում Երևանում բավականին շենքեր են կառուցվել, ոմանք համապատասխանում են ճարտարապետական չափոշիչներին, ոմանք՝ ոչ:
