Հասարակություն

Քիմիական ֆիզիկայի արդի խնդիրները՝ ԳԱԱ-ում

aidaavetisyan
Գիտությունների ազգային ակադեմիան մեկ հարկի տակ է հավաքել աշխարհի տարբեր անկյուններից ժամանած  շուրջ  150 գիտնականների՝ քննարկելու  քիմիական ֆիզիկայի արդի խնդիրները: Միջազգային 4- րդ գիտաժողովի նպատակն է  ընդհանրացնել վերջին տարիներին ստացված արդյունքները: «Քիմիական ֆիզիկայի  արդի խնդիրները» 4-րդ միջազգային գիտաժողովն անցկացվում է  ՀՀ ԳԱԱ  քիմիական և երկրի մասին բաժանմունքի  նախաձեռնությամբ և   ՀՀ կրթության և գիտության պետական կոմիտեի ֆինանսական աջակցությամբ:

 

 

150 գիտնականներ աշխարհի տարբեր անկյուններից  հավաքվել են Հայաստանում՝  քիմիական ֆիզիկայի առաջնային ուղղություններում վերջին մի քանի տարիներին ստացված կարևորագույն արդյունքներն ի մի բերելու և  քննարկելու քիմիական ֆիզիկայի զարգացման հեռանկարները, քիմիական ռեակցիաների  նպատակային  ղեկավարման և նոր նյութերի ստացման հիմնարար ու  կիրառական հիմնահարցերը: Թվով 4-րդ միջազգային գիտաժողովում օտարերկրացի գիտնականների կողմից  ներկայացվող զեկույցները ԳԱԱ քիմիական ֆիզիկայի ինստիտուտի  տնօրեն  Լևոն Թավադյանի գնահատմամբ ժամանակակից է և  այս  հանդիպումը մեր գիտնականներին լավագույն հնարավորությունն է  ընձեռում  իրենց գիտելիքների շտեմարանը համալրել աշխարհում կիրառվող նորամուծություններով:

Քիմիական ֆիզիկայի ոլորտում նորագույն մեթոդների զեկույցներով  ոչ միայն օտարերկրացի հյուրերը ներկայացան, այլև մեր գիտնականներն իրենց աշխատանքները ներկայացրին գործընկերներին: ՀՀ  ԳԱԱ  քիմիական ֆիզիկայի ինստիտուտի  առաջատար գիտաշխատող Պետրոս Ղուկասյանի գիտական աշխատանքը  ոչ ստացիոնար բաղադրության օքսիդների մեծ ակտիվության մասին է, որը նրա խոսքով՝ պրակտիկ գործունեության պարագայում  մեծ  արդյունքներ կտա:

Հայաստանում ժամանակին գործել են քիմիական  մեծ գործարաններ: Սակայն տարիների ընթացում դրանք  ոչնչացվեցին: 2010 թվականին էլ կասեցվեց ամենախոշոր գործարաններից Նաիրիտի շահագործումը: Այս դեպքում հարց է առաջանում՝  նման գիտաժողովներից քաղած գիտելիքները, որտե՞ղ  պետք է կիրառեն մեր մասնագետները: Գիտաշխատողը լավատեսորեն  պատասխանեց, որ նման գիտաժողովները կարող են խթանել խոշոր ձեռնարկությունների վերաբացմանը:

«Մենք չենք կարող աչքներս փակել և ասել չունենք և վերջ,  դա հնարավոր չէ: Այս գիտաժողովները պետք է լինեն, որպեսզի մենք արթնանանք  և նորից ոտքի կանգնենք  ու ավելի լավը ստեղծենք»:

Back to top button