Հասարակություն

Նվեր երեւանցիներին՝ Երեւանի տոնին

aidaavetisyan
Արդեն երկրորդ տարին Երևանի քաղաքապետի նախաձեռնությամբ «Էրեբունի-Երևան» տոնակատարությունների շրջանակներում, Երևանի ծննդյան տարիների թվով պայմանավորված՝ մայրաքաղաքի 2797 ընտանիքի կհանձնվի էլեկտրատեխնիկական սարքավորումներ: Ծրագրի մեկնարկը տրվել է այսօր և կավարտվի հոկտեմբերի 10-ին: Սոցիալական այս ծրագրում ընդգրկված են տարբեր խմբեր՝ Հայրենական պատերազմի վետերաններ, արցախյան և աֆղանական պատերազմների մասնակիցներ, Արցախում զոհվածների ընտանիքներ ու հաշմանդամներ, հակառակորդի հետ շփման գծում 2014-15 թթ զոհված զինծառայողների, ինչպես նաև միաժամանակ  2 զինծառայող ունեցող ընտանիքներ, գիտության և մշակույթի գործիչներ, վաստակաշատ բուժաշխատողներ ու մանկավարժներ, կարիքավոր սիրիահայ, ինչպես նաև միակողմանի և երկկողմանի ծնողազուրկ երեխա ունեցող ընտանիքներ, ցեղասպանություն վերապրած անձինք:

 

«Էրեբունի- Երևան» տոնակատարության  շրջանակներում արդեն երկրորդ տարին Երևանի քաղաքապետարանը նախաձեռնում է սոցիալական ծրագիր՝ Երևանի տոնին  նվեր երևանցիներին: Այս տարի ևս  Երևանի ծննդյան տարիների թվով պայմանավորված՝ մայրաքաղաքի 2797 ընտանիք նվեր կստանա սառնարան, լվացքի մեքենա, վառարան, գազօջախ, հեռուստացույց, փոշեկուլ և այլ էլեկտրատեխնիկական սարքավորումներ: Սոցիալական ծրագրի մեկնարկն ազդարարվեց այսօր և կձգվի մինչև  հոկտեմբերի  10-ը: Երևանի քաղաքապետարանի սոցիալական ապահովության վարչության պետ  Ռուզաննա Զաքարյանի խոսքով՝ այս տարվա ծրագրում ընդգրկված չեն նախորդ տարվա  ծրագրում ներառված ընտանիքները:  Ընտանիքներին նվերները բաշխվել են  ըստ անհրաժեշտության:

«Այս ծրագիրը սոցիալական նշանակությունից բացի մի բարի խորհուրդ ևս ունի: Այն է, որ այս ընտանիքները տոնի կապակցությամբ ամեն անգամ նվերներն օգտագործելիս լցվելու են ջերմությամբ ու բարությամբ, որովհետև հիշելու են , որ այն ստացել են Երևանի տոնի կապակցությամբ և այդպես ջերմորեն էլ վերաբերելու են իրենց մայրաքաղաքին»:

Ծրագրում ներառված են մայրաքաղաքի բոլոր վարչական շրջանները: Սակայն շրջայցս  Երևանի քաղաքապետարանի  աշխատակիցների և   Էրեբունու թաղապետարանի աշխատակիցների  հետ   հենց համանուն շրջանում էր, որտեղ սոցիալապես անապահով , սիրիահայ կարիքավոր և  ազատամարտիկ ունեցող  ընտանիքներին հանձնվեցին նվերները: Սոցիալապես վատթար պայմաններում բնակվող բազմազավակ  Վարդանյանների ընտանիքի համար  նվերն անակնկալ էր, չէին սպասում: Երբևէ որևէ տեղից   նման ուշադրության չեն արժանացել, նշում է  տանտիկինը՝ Նաիրա Վարդանյանը:

Ծրագրում ընդգրկված են ոչ միայն մեր համաքաղաքացիները, այլև սիրիահայ  կարիքավոր ընտանիքներն անմասն չեն մնացել: Մելքոնյանների  ընտանիքը սիրիական պատերազմի հետևանքով 2013 թվականին եկել ու  բնակություն է հաստատել հայրենի հողում: Երեք ապագա զինվորներ դաստիարակող  ընտանիքի համար  հայրենիքում դժվարությունների ճամփան դեռևս ձգվում է, սակայն փորձում են  հաղթահարել ու պատվով մեծացնել երեք զավակներին՝ Դավթին, Դրաստամատին և Նժդեհին: Հայկականությունը նույնիսկ օտար  ափերում պահպանած  ընտանիքն էլ այսօր   Երևանի ծննդյան կապակցությամբ ստացավ իր  նվերը:

Ծրագրի  պատասխանատուների խոսքով՝ ծրագիրը դառնալու է ավանդույթ և ամեն  տարի ընդգրկելով  նոր ընտանիքներ՝ կփորձեն մի փոքր թոթափել կարիքավորների հոգսերը:

Back to top button